បាត់ដំបង ៖ ប្រជាពលរដ្ឋយកគ្រឿងចក្រម៉ៃខូង ជីកស្រះ ប្រទះឃើញគ្រោងឆ្អឹងមនុស្ស និងវត្ថុបុរាណជាច្រើន ដែលសន្និដ្ឋានជាឆ្អឹងមេទ័ពមុនសម័យអង្គរ រួចយកមកទុកនៅខ្ទមមួយកន្លែងក្បែរនោះដុតធូបសុំសេចក្តីសុខ ហើយមានមន្ត្រីរាជការចុះទៅជាបន្តបន្ទាប់ នៅថ្ងៃទី២៥ ខែមិនា ឆ្នាំ២០១៥ ចំណុចភូមិកំប្រ៉ង់ឃុំតាក្រីស្រុកំរៀងខេត្តបាត់ដំបង ។
ឈ្មោះ ឈឿន ឈួន ភេទប្រុសអាយុ៤៣ឆ្នាំ ជាប្រជាពលរដ្ឋរស់នៅកំប្រង់ ឃុំតាក្រី ស្រុកកំរៀង ខេត្តបាត់ដំបង បានអោយដឹងថា លោកទើបតែមកសង់ផ្ទះនៅលើដីខាងលើនេះបានចំនួន ២ ខែតែប៉ុណ្ណោះ ស្របពេលអាជ្ញាធរអភិវឌ្ឍន៍ផ្លូវថ្មី នៅថ្ងៃទី២០ និងទី២១ ខែមិនា រូបលោកបានអោយគ្រឿងចក្រម៉ៃខូងវាយព្រៃជីកស្រះក្នុងដីចំការ បានគ្រោងឆ្អឹង អាចមុនសម័យអង្គរនិងបុរាណទាំងនេះដូចជា ៖ ឆ្អឹងមនុស្សធំៗ ឆ្អឹងម្រាមដៃ ជើងធំវែង និងផ្តិលលុងហិនផ្តិល ស្ពាន់ និងក្អម ដែលធ្វើពីភក់ល្បាប់ជាច្រើនផងដែរ ដោយឡែក ផ្នែកលលាក្បាលមិនទាន់ឃើញមានទេ ។
លោក ឈឿន ឈួន បន្តថា មូលហេតុដែលពលរដ្ឋគ្រប់គ្នាថា វត្ថុបុរាណទាំងនេះ រួមទាំងគ្រោងឆ្អឹងជាវត្ថុមួយ ដែលកើតមុនសម័យអង្គរ សំអាងលើក្អមភក់ល្បាប់ ហើយគ្រោងឆ្អឹងមានកងដៃ ដែលពួកគាត់នាំគ្នាសន្មត់ថា ជាមេទ័ពស្រីមុនសម័យអង្គរ ។ ហើយបច្ចុប្បន្នវត្ថុបុរាណទាំងនេះ រួមគ្រោងឆ្អឹងលោក ឈឿន ឈួន បានរៀបចំកន្លែងទុកដាក់នៅខ្ទមខាងមុខផ្ទះ ដើម្បីឲ្យសាធារណៈជន បានឃើញគ្រប់ៗគ្នា ។ តាំងពីថ្ងៃទី២០ ខែមិនា មកដល់ថ្ងៃទី២៥ ខែមិនា ឆ្នាំ២០១៥ ក៏មានមន្ត្រីរាជការចូលមកអុចធូបគោរពបូជា និងសុំសេចក្តីសុខជាហូរហែផងដែរ ៕
ដោយ សុខ កុសល
