បាត់ដំបង ៖ ជនសង្ស័យ ៥នាក់ត្រូវកម្លាំងនគរបាលស្រុកកំរៀងស្រាវជ្រាវ ចាប់បានជាបន្តបន្ទាប់កាលថ្ងៃទី១៨ ខែមីនា ឆ្នាំ២០១៥ ចំណុចផ្សារចាស់ភូមិដូង ឃុំបឹងរាំង ស្រុកកំរៀង បន្ទាប់ពីបានធ្វើសកម្មភាព បុកទម្លាយទ្វារផ្ទះចូលវាយប្លន់ដោយដាវសាម៉ូរ៉ៃ ភ្ជង់យកលុយគ្រួសារ អ្នកលក់ត្រី និងរត់ម៉ូតូឌុបសន្សំប្រាក់ដើម្បីទិញឡានដូរបរ អស់មួយចំនួនធំ កាលពីវេលាម៉ោង៣ទៀបភ្លឺ ថ្ងៃទី១៤ ខែមីនាឆ្នាំ២០១៥ កន្លងទៅ ។
លោក ស្រី វុឌ្ឍី អធិការរងនគរបាលស្រុកកំរៀង បានឲ្យដឹងថា ជនរងគ្រោះឈ្មោះ ឈុន ហ៊ាង អាយុ ៥៧ ឆ្នាំ និងប្រពន្ធឈ្មោះ ស៊ីម អាន អាយុ៣៧ឆ្នាំ រស់នៅភូមិដូងឃុំបឹងរាំងស្រុកកំរៀង។ចំណែកក្រុមជនសង្ស័យមាន ទី១ ឈ្មោះ យ៉ា ជាង អាយុ ២៨ ឆ្នាំ ភូមិស្វាយ ឃុំបឹងរាំង ។ ទី២ឈ្មោះ ឃុន ឌី អាយុ ២៧ ឆ្នាំ ទី៣ ឈ្មោះ ជា ចាន់កូ ហៅ គោ អាយុ៤៣ឆ្នាំ គ្មានទីលំនៅ ។ ទី៤ ឈ្មោះ សេង ប៊ុថៃ អាយុ២៩ឆ្នាំ ទី៥ ឈ្មោះ ទាវ ផល្លី ហៅ ប៊ិប អាយុ៣២ឆ្នាំ ភូមិដូងឃុំបឹងរាំង ។
ជនរងគ្រោះ២នាក់ប្តីប្រពន្ធបានអោយដឹងថា កាលពីម៉ោង៣ទៀបភ្លឺ ថ្ងៃទី១៤ ខែមិនា ឆ្នាំ២០១៥ ពេលពួកខ្លួនដេកនៅក្នុងផ្ទះភូមិដូងឃុំបឹងរាំងស្រុកកំរៀង ខ្លួនឮសម្លេងមនុស្សរត់ប្រហែល ២ បីនាក់ក្បែរជញ្ជាំងផ្ទះ ខ្លួនបើកអំពូលភ្លើងក្រៅផ្ទះ ពេលនោះពួកវាវាយបំបែកអំពូលភ្លើង ពួកវាបិទមុខ២នាក់ បានបុកទ្វារមុខក្រោយ ទំលុះចូលផ្ទះ ហើយម្នាក់បិតមុខធាក់ខ្លួន(ប្តី)ដួលយកដាវសាម៉ូរ៉ៃភ្ជង់ ម្នាក់ទៀត អត់បិទមុខយកកូនសោរគាស់កែបម៉ូតូ យកកាបូបលុយប្រពន្ធលក់ត្រី និងខ្លួនរត់ម៉ូតូឌុបសន្សំដើម្បីទិញរថយន្តប្តូរមុខរបរ ក្នុងនោះប្រាក់ថៃចំនួន១៧០០០បាត (មួយម៉ឺនប្រាំពីរពាន់បាត) និងប្រាក់អាមេរិក៥០០០ដុល្លា (ប្រាំពាន់ដុល្លា) ក្រោយធ្វើសកម្មភាពរួច ពួកវារួចរត់ចេញទៅបាត់ ។
ជនសង្ស័យទាំង៥នាក់បានសារភាពថា ពួកខ្លួន៥នាក់ កាលពីយប់ថ្ងៃកើតហេតុ បានជុំគ្នានៅមុខកាស៊ីណូ រីអូ បបួលគ្នាទៅប្លន់លុយនៅកែបម៉ូតូជនរងគ្រោះមានទីលំនៅ ស្រះទឹក ក្នុងភូមិដូង ដោយមានអ្នកយាមផ្លូវ ២ នាក់ ក្រោយធ្វើសកម្មភាពជួបជុំគ្នា នៅផ្សារចាស់ភូមិដូង បន្ទាប់មកនាំគ្នាទៅក្នុងព្រៃរាប់លុយបាន១៥០០០បាត ចែកលុយគ្នាបានម្នាក់៣០០០បាត ហើយចែកផ្លូវគ្នា ។ លុយដែលបានពីប្លន់យកចាយអស់ លុះថ្ងៃទី១៨ ខែឆ្នាំដដែល ក៏ត្រូវនគរបាលឃាត់ខ្លួនតែម្តង ។
លោកស្រី វុឌ្ឍី អធិការរងនគរបាលស្រុកកំរៀង បានបញ្ជាក់ថា ជនសង្ស័យទាំង៥នាក់ ត្រូវកសាងសំណុំរឿងមានលួចមានស្ថានទម្ងន់ទោស បញ្ជូន ទៅស្នងការដ្ឋាននគរបាលខេត្តនារសៀលថ្ងៃទី១៩ ខែមិនា ឆ្នាំ ២០១៥ ចាត់ការតាមផ្លូវច្បាប់ ៕
