បាត់ដំបង ៖ ២ នាក់មីងក្មួយលក់ចែកចាយគ្រឿងញៀន បានធ្លាក់ចូលអន្ទាក់សមត្ថកិច្ចកម្លាំងអាវុធហត្ថ នៃ ការិយាល័យស្រាវជ្រាវ ប្រឆាំងគ្រឿងញៀនឃាត់ខ្លួននិងដកហូតបានថ្នាំញៀនម៉ាទឹកកក៣ថង់ ស្មើនិង ១២,១៤ក្រាម កាលពីវេលម៉ោង ១២ ថ្ងៃទី១៧ ខែមីនា ឆ្នាំ២០១៥ នៅចំណុចក្នុង ផ្សារបូរីថ្មី ស្ថិតក្នុង ភូមិកម្មករ សង្កាត់ស្វាយប៉ោ ក្រុងបាត់ដំបង។
លោក ហេង សេងហុង នាយអាវុធហត្ថការិយាល័យ ស្រាវជ្រាវប្រឆាំងគ្រឿងញៀន បានឲ្យដឹងថាជនសង្ស័យប្រុសស្រីដែលឃាត់ខ្លួនមាន៖ ទី១ ឈ្មោះ រិទ្ធ ឃ្លីន ភេទប្រុស អាយុ២៣ឆ្នាំ មុខរបរ ជាងសំណង់ រស់នៅ ភូមិតាព្រួច សង្កាត់ក្តុលដូនទាវ ក្រុងបាត់ដំបង និងទី២ឈ្មោះ អៃ ឌៀប ភេទស្រី អាយុ៣០ឆ្នាំមុខរបរលក់ដូរត្រូវជាមីង(ឈ្មោះ រិទ្ធ ឃ្លីន) រស់នៅ ភូមិដូនទាវ ឃុំពាមឯក ស្រុកឯកភ្នំ ។វត្ថុតាងរឹបអូស បានថ្នាំញៀនម៉ាទឹកកកចំនួន៣ថង់ ស្មើនិងទម្ងន់១២.១៤ក្រាម។
ស្ត្រីជនសង្ស័យបានឆ្លើយសារភាពថា ខ្លួនបានទិញថ្នាំញៀនពី គេយកមកលក់ ទម្ងន់ក្នុង១ជីតម្លៃ៧៥ម៉ឺនរៀល ហើយខ្លួន បានប្រើក្មួយប្រុសខាងប្តី ឲ្យជួយលក់បន្តក៏ត្រូវ សមត្ថកិច្ចឃាត់ខ្លួនបានតែម្តង។
លោក ហេង សេងហុង បានបញ្ជាក់ថាកាលម៉ោង១១ថ្ងៃត្រង់ ថ្ងៃទី១៧ ខែមីនា ឆ្នាំ២០១៥កម្លាំងបានទំនាក់ទំនងឈ្មោះ អៃ ឌៀប ភេទស្រីដើម្បីទិញថ្នាំញៀន ប្រហែល១៥នាទីក្រោយមកម្ចាស់ថ្នាំបានណាត់ជួបនៅភូមិរំចេក៤សង្កាត់រតៈក្រុងបាត់ដំបងដោយពួកគេជិះម៉ូតូស្មាស់១គ្រឿង ប៉ុន្តែការទិញដូរពេលនោះត្រូវពន្យាពេល។លុះម៉ោង១២ថ្ងៃត្រង់ថ្ងៃដដែលកម្លាំងជំនាញបានទំនាក់ទំនងពួកគេមកផ្សារបូរីថ្មីក្នុងភូមិកម្មករសង្កាត់ស្វាយប៉ោក្រុងបាត់ដំបងទើបឃាត់ខ្លួនបានជនសង្ស័យទាំង២នាក់តែម្តង។
បច្ចុប្បន្នមន្ត្រីជំនាញ បានកសាងសំណុំរឿងបញ្ជូនខ្លួន និងវត្ថុតាងទៅតុលាការខេត្ត ដើម្បីនៅរសៀលថ្ងៃទី១៨ ខែមីនា នេះដម្បីចាត់ការតាមច្បាប់ ៕
