បាត់ដំបង ៖ កម្លាំងអាវុធហត្ថក្រុងបាត់ដំបង បញ្ជូនមនុស្សប្រុសស្រី៣នាក់ និងថ្នាំញៀនម៉ាទឹកកក២០ថង់ ទម្ងន់៤,៧៨ក្រាម និងសម្ភារៈប្រើប្រាស់វេចខ្ចប់ ពីបទចែកចាយគ្រឿងញៀន ទៅតុលាការកាលពីព្រឹកថ្ងៃទី១៨ ខែមីនា ឆ្នាំ២០១៥ ចាត់ការតាមនិតិវិធី។
ក្រុមជនសង្ស័យត្រូវកម្លាំងអាវុធហត្ថក្រុងឃាត់ខ្លួនបាន នៅម៉ោងជាង៨យប់ ថ្ងៃទី១៦ ខែមិនា នៅចំណុចផ្ទះជួល ភូមិរំចេក៣ សង្កាត់រតនៈ ក្រុងបាត់ដំបង ។
លោកសំវីឡុង មេបញ្ជាការរងអាវុធហត្ថក្រុងបាត់ដំបងបានឲ្យដឹងថា ក្រុមជនសង្ស័យឃាត់ខ្លួនទាំងបីនាក់មាន ទី១ ឈ្មោះ ហេងឃាងភេទប្រុសអាយុ២៩ឆ្នាំស្រុកកំណើតភូមិ២០ឧសភាសង្កាត់ស្វាយប៉ោក្រុងបាត់ដំបងបច្ចុប្បន្នរស់នៅផ្ទះជួលភូមិរំចេក៣សង្កាត់រតនៈ ក្រុងបាត់ដំបង។ទី២ឈ្មោះលន់លាងគីមភេទស្រីអាយុ២៤ឆ្នាំស្រុកកំណើតភូមិចុងកោះសង្កាត់ផ្សារឆ្នាំងក្រុងនិងខេត្តកំពង់ឆ្នាំង។ទី៣ឈ្មោះសយរដ្ឋាភេទស្រីអាយុ២៣ឆ្នាំស្រុកកំណើតភូមិឃុំព្រៃរវៀស្រុកព្រៃកប្បាសខេត្តតាកែវ។ឈ្មោះលន់លាងគីមនិងឈ្មោះ សយ រដ្ឋា សព្វថ្ងៃនៅផ្ទះជួល ជាមួយគ្នាភូមិរំចេក ៣ សង្កាត់រតនៈ ក្រុងបាត់ដំបង ។ ចំណែកវត្ថុតាងដែលដក ហូតបាន ក្នុងប្រតិបត្តិការជាក់ស្តែង មានថ្នាំញៀនប្រភេទម៉ាទឹកកក ចំនួន២០ថង់ ស្មើទម្ងន់៤,៧៨ក្រាម លុយខែ្មរ៣៥ម៉ឺនរៀល ជញ្ជីងថ្លឹងថ្នាំញៀន១គ្រឿង ទូរស័ព្ទដៃ៤គ្រឿង និងសម្ភារៈវេចខ្ចប់មួយចំនួន ។
ជនសង្ស័យឈ្មោះ ហេង ឃាង បានឆ្លើយថា ខ្លួនទើបរកស៊ីចែកចាយថ្នាំញៀនជាង១ខែ ដោយទិញថ្នាំញៀនចំនួន៥០ម៉ឺនរៀល ម្តងពីឈ្មោះ ធី នៅភូមិរំចេក៤ សង្កាត់រតនៈ រួចរំលែកដាក់ថង់តូចៗលក់បន្ត ។ នៅម៉ោង៤រសៀលថ្ងៃទី១៦ ខែមិនា ខ្លួនបានកម្ម៉ង់ទិញថ្នាំ ពីឈ្មោះធីចំនួន៥០ម៉ឺនរៀលទៀត រួចទុកថ្នាំនេះឲ្យសង្សារឈ្មោះ លន់ លាងគីម ហើយខ្លួនក៍ចេញទៅក្រៅដើម្បីជួបមិត្តភក្តិ ។ លុះម៉ោង៩កន្លះយប់ ខ្លួនបានទូរស័ព្ទប្រាប់សង្សារឲ្យយកថ្នាំញៀនម៉ាទឹកកក ២ ថង់លក់ឲ្យគេក្នុងតម្លៃ២០ដុល្លារ ក៏ត្រូវសមត្ថកិច្ចចាប់ខ្លួនតែម្តង ។
ចំណែកស្ត្រី លន់ លាងគីម និង សយ រដ្ឋា បានឆ្លើយសារភាពថា ខ្លួនពិតជាបានចូលរួមលក់ថ្នាំញៀនជាមួយឈ្មោះ ហេង ឃាង ពិតមែន ។
លោក សំ វីឡុង មេបញ្ជាការរងអាវុធហត្ថក្រុងបាត់ដំបងបានបញ្ជាក់ថា ជនសង្ស័យទាំង៣នាក់ រួមនឹងវត្ថុតាងថ្នាំញៀន ម៉ាទឹកកក ត្រូវបញ្ជូនទៅតុលាការខេត្តនៅព្រឹកថ្ងៃទី១៨ ខែមីនា នេះ ដើម្បីចាត់ការតាមនិតិវិធី ៕
