បាត់ដំបង ៖ រថយន្តដឹកទំនិញកាំម៉ារី នីសាន់ ទួរីសដឹកទំនិញ ត្រូវឈប់បង់ប្រាក់ជូនលោកស្រ៊ុនធឿនគយរដ្ឋាករចល័តប្រចាំកាលើផ្លូវជាតិលេខ៥ភូមិអូរតាគីឃុំអូរតាគីស្រុកថ្មគោលខេត្តបាត់ដំបងនិងផ្លូវជាតិលេខ៥៧អាភូមិបឹងរាំងសង្កាត់អូរម៉ាល់ក្រុងបាត់ដំបងដោយការប្រមូលប្រាក់ពន្ធនេះទុកក្នុងហោប៉ៅខ្លួនឯងមិនបង់ចូលរដ្ឋទេតាមការអោយដឹងរសៀលថ្ងៃទី១២ខែមីនាឆ្នាំ២០១៥។
ប្រភពបានអោយដឹងថា រថយន្តកាំម៉ារីដឹកផ្លែឈើត្រូវបង់ជូនលោក ស្រ៊ុន ធឿន ជាប្រចាំក្នុង ១ខែ ១៥ ម៉ឺនរៀល ។ រីឯរថយន្តនីសាន់ដឹកអីវ៉ាន់វិញក្នុង ១ ជើង ឈប់បង់ប្រាក់ចំនួន ៥ ម៉ឺនរៀល ។ ចំណែករថយន្តទួរីសដឹកអីវ៉ាន់ក្នុង១ជើង១០ម៉ឺនរៀល ដោយប្រាក់ទាំងនេះដាក់ចូលហោប៉ៅស្ងាត់ៗមិនមានលិខិតស្នាមត្រឹមត្រូវទេ ។ រីឯឈ្មួញដឹកទំនិញគេចពន្ធលំដាប់ខ្ពស់មានឈ្មោះចែឡាង ដឹកគ្រឿងអគ្គីសនី និងប្រេងម៉ាស៊ីនរថយន្ត ។ ឈ្មួញឈ្មោះ កុងទ្រី ហៅ អេងសេង ហុង ជានាយទាហាន និង ឈ្មោះ ប៉ុល ស៊ីនួន នាយឧត្តមសេនីយោធា មានដឹកទំនិញគ្រឿងរថយន្ត និងគ្រឿងបរិភោគ និងឈ្មោះ ពេជ្រ វណ្ណា នាយយោធាទំនាក់ទំនងព្រំដែនគោក ដឹកស៊ីម៉ង់ និងឈ្មួញឈ្មោះហ៊ី ដឹកអីវ៉ាន់គេចពន្ធចម្រុះពីច្រកព្រំដែនខេត្តប៉ៃលិននិងខេត្តបាត់ដំបង ចេញពីប្រទេសថៃ ចូលមកប្រទេសកម្ពុជា ក៏ត្រូវបានលោក ស្រ៊ុន ធឿន គយរដ្ឋាករចល័តទុកពន្ធក្រៅបញ្ជីរដ្ឋខ្លះដែរ ។ មិនតែប៉ុណ្ណោះនៅឈ្មួញមួយចំនួនទៀត ដែលមិនស្គាល់ឈ្មោះ ត្រូវបានលោក ស៊ុន ធឿន ដើរប្រមូលប្រាកពន្ធប្រចាំខែនៅតាមទីតាំងលក់ឬតាមផ្ទះតែម្តង ។
ពាក់ព័ន្ធនេះ លោក ស្រ៊ុន ធឿន គយរដ្ឋាករចល័តបានប្រាប់អ្នកយកព័ត៌មានតាមទូរស័ព្ទថា រូបលោកមិនបានឃើញមានរថយន្តនីសាន់ដឹកទំនិញណាឈប់បង់ប្រាក់នកន្លែងគាត់ឡើយ ៕
