បាត់ដំបង ៖ ប្រជាពលរដ្ឋជិត១០០នាក់បានតវ៉ាសុំអោយទំលាក់អង់តែនទូរស័ព្ទប្រព័ន្ធស្មាត (អតីតហេឡូ) នៅផ្ទះ ង៉ែត សារ៉េត ព្រោះប៉ះពាល់សុខភាពអ្នកជិតខាង ពេលកំពុងរៀបចំតំឡើងប្រេកង់ថ្មីបន្តទៀត កាលពីម៉ោង១០និង៣០នាទីព្រឹកថ្ងៃទី៩ខែមីនា ឆ្នាំ២០១៥ ចំណុចក្រុមទី៥ភូមិអូរតាគាំ២សង្កាត់ទួលតាឯក្រុងបាត់ដំបង។
ប្រជាពលរដ្ឋបានសុំអោយម្ចាស់ផ្ទះឈ្មោះ ង៉ែត សារ៉េត ភេទប្រុសអាយុ៦៤ឆ្នាំ និងអាជ្ញាធរជួយទំលាក់អង់តែនទូរស័ព្ទប្រព័ន្ធស្មាត (អតីតហេឡូ) ដែលដាក់លើផ្ទះលោក ង៉ែត សារ៉េត បង្កអោយប៉ះពាល់ដល់ដំណាំដូង និងសុខភាពមនុស្សដូចជាជំងឺលើសឈាមខ្សោយបេះដូង រោគរលាកប្រព័ន្ធសសៃប្រសាទជាដើម ។
ឈ្មោះ ង៉ែត សារ៉េត ម្ចាស់ផ្ទះបានអោយដឹងថា រូបលោកមិនអាចដោះឬទម្លាក់បានដោយងាយយៗទេ ព្រោះក្រុមហ៊ុនជួលតាំងពីឆ្នាំ២០០៥ ដោយមានកិច្ចសន្យា១០ឆ្នាំ ហើយការដាក់ទីតាំងនិងជួសជុលបន្តនេះ ដោយខ្វះ៣ឆ្នាំទៀត ទើបផុតអាណត្តិហើយបើអោយលោកឈប់ជួលអោយគេ តើនរណាជាអ្នករកចំណូលជូនក្រុមគ្រួសាររបស់ខ្លួន។
ពាក់ព័ន្ធករណីនេះ លោក សៀង ឯមវូនស្ហី អភិបាលក្រុងបាត់ដំបងបានអោយដឹងថា ការតវ៉ារបស់ប្រជាពលរដ្ឋសុំមិនអោយសាងសង់អង់តែនទូរស័ព្ទបន្តទៅទៀត រូបលោកបានទទួលព័ត៌មានហើយ ប៉ុន្តែខាងក្រុមហ៊ុនគេមានច្បាប់ទំលាប់ត្រឹមត្រូវ ដូច្នេះរូបលោកបានស្នើទៅលោកអភិបាលរងខេត្តទំនាក់ទំនង ទៅខាងក្រុមហ៊ុនសុំផ្អាកជាបណ្តោះអាសន្នដើម្បីរកកិច្ចចចារដោះស្រាយរួច ទើបអាចដំណើរការបាន ៕
