ខេត្តរតនគិរី ៖ រថយន្តឡង់គ្រីស័រដឹកឈើប្រណិត ២៣ ដុំ របស់ ថោង សុខឡាយ មន្ត្រីយោធាក្នុងអង្គភាពទីចាត់ការឃោសនាព័ត៌មានអ គ្គបញ្ជាការមានលិខិតបញ្ជាបេសកកម្ម ប្រចាំខេត្តរតនគិរីត្រូវ នគរបាល ប្រឆាំងបទល្មើសសេដ្ឋកិច្ចក្រសួងមហាផ្ទៃ សហការជាមួយកម្លាំងនគរបាលស្រុកអូរជុំឃាត់លើកទី២ កាលពីវេលាម៉ោង៣និង៣០នាទីរសៀល ថ្ងៃទី០៨ ខែមីនា ឆ្នាំ២០១៥នៅចំណុច លើផ្លូវជាតិលេខ ៧៨ Aលើទួលមួយកន្លែង ស្ថិតក្នុងភូមិថារ៉ងជង ឃុំអូរជុំ ស្រុកអូរជុំ ខេត្តរតនគិរី ។
លោក គឹម ពិសី មន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានប្រាប់ឲ្យដឹងថា ដោយទទួលព័ត៌មានថាមានឈើប្រណិតឆ្លងតាមទូកលើកដាក់រថយន្តដឹកចេញពីភូមិសាស្ត្រស្រុកវ៉ឺនសៃ ចូលមកក្រុងបានលុងរូបលោកបានរៀបចំកម្លាំងសហការកម្លាំងនគរបាលស្រុកអូរជុំចាំស្ទាក់ចាប់តែម្តង ។រថយន្តដឹកឈើប្រណិត ម៉ាកឡង់គ្រីស័រ ពណ៌ស្លែ ពាក់ស្លាកលេខភ្នំពេញ 2G-7499 ឈើចំនួន២៣ដុំមុខកាត់១០គុណ៤០គុណ០៨មានម្ចាស់ឈ្មោះ ថោង សុខឡាយ មន្ត្រីយោធាឋានៈវរសេនីយ៍ទោ បម្រើការងារ ក្នុងអង្គភាពទីចាត់ការ ឃោសនាព័ត៌មាន អគ្គបញ្ជាការមានលិខិតបញ្ជាបេសកកម្មប្រចាំខេត្តរតនគិរី ។
ប្រភពពីសមត្ថកិច្ចមួយចំនួនបានអោយដឹងថារថយន្តមន្ត្រីយោធាខាងលើនេះ គេតែងសង្កេតឃើញលួចបន្លំដឹកឈើជាញឹកញាប់ណាស់បម្រុងឆ្ពោះទៅប្រទេសវៀតណាមហើយកន្លងមកហើយសមត្ថកិច្ចបាននគរបាលវរការពារព្រំដែនលេខ 623 បានចាប់បញ្ជូនមករដ្ឋបាលព្រៃឈើម្តងដែរតែមិនរាងចាល។
លោក ថោង សុខឡាយ ម្ចាស់រថយន្តដឹកបានអោយដឹងថាពេលទៅលេងនៅផ្ទះម្តាយក្មេកបានដាក់ឈើប្រណិត៤ទៅ៥ដុំយកមកគ្រាន់ដោះដូរថ្លៃសាំងរថយន្តប៉ុណ្ណោះ ខ្លួនមិនមែនជាអ្នករកស៊ីឈើស្អីទេ។
លោក គឹម ពិសី មន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ បានបញ្ជាក់ថា វត្ថុតាង រថយន្ត និងឈើប្រណីត២៣ដុំ ត្រូវបានកសាងសំណុំរឿង បញ្ជូនឲ្យមន្ត្រីរដ្ឋបាលព្រៃឈើផ្នែកវ៉ឺនសៃ យកទៅរក្សា ទុក ដើម្បីចាត់ចែងតាមច្បាប់ ៕
