បាត់ដំបង ៖ កម្លាំងនគរបាលស្រុកឯកភ្នំ បញ្ជូនបុរស៣នាក់ពីបទហឹង្សា មានស្ថានទម្ងន់ទោស បង្កអោយបុរសម្នាក់ស្លាប់ទៅស្នងការដ្ឋាននគរបាលខេត្ត នារសៀលថ្ងៃទី០១ ខែមីនា ឆ្នាំ២០១៥ ចាត់ការតាមផ្លូវច្បាប់ ។
ហេតុការណ៍ឃាត់ខ្លួនក្រុមជនសង្ស័យ ធ្វើឡើងកាលម៉ោង ៥ រសៀល ថ្ងៃទី២៨ ខែកុម្ភៈ ឆ្នាំ២០១៥នៅភូមិឃុំព្រៃចាស់ស្រុកឯកភ្នំ។ ហេតុការណ៍វាយតប់គ្នាកាលម៉ោង១៧រសៀល ថ្ងៃទី២៧ ខែកុម្ភៈ ឆ្នាំ២០១៥ នៅចំណុចតារាងបាល់ទះភូមិឃុំព្រៃចាស់ស្រុកឯកភ្នំ ។
នគរបាលបានអោយដឹងថា ជនរងគ្រោះស្លាប់ មានឈ្មោះវនវិន ភេទប្រុស អាយុ៣១ឆ្នាំ របួសបែកក្បាលរស់នៅភូមិកើតហេតុ ។ ក្រោយពីព្យាបាលនៅមណ្ឌលសុខភាពឃុំត្រឡប់ទៅផ្ទះវិញ ស្លាប់នៅម៉ោង ៣ ភ្លឺថ្ងៃទី២៨ ខែកុម្ភៈ ឆ្នាំ២០១៥ ។ ចំណែកក្រុមជនសង្ស័យ ឃាត់ខ្លួនទី ១ ឈ្មោះ ឈឿម ផានិត ហៅ ម៉ៅ អាយុ ២៣ ឆ្នាំ ។ ទី២ ឈ្មោះ ឌី វាសនា អាយុ ២៣ ឆ្នាំ ។ ទី៣ ឈ្មោះ សេន សុភា អាយុ២៣ឆ្នាំ រងរបួសធ្ងន់ត្រូវច្រវ៉ាទូក ។ ទាំង ៣ នាក់ រស់នៅភូមិកើតហេតុ។
ប្រជាពលរដ្ឋនៅភូមិព្រៃចាស់បានអោយដឹងថា ជនរងគ្រោះឈ្មោះ វន វិន ជាមនុស្សយ៉ាប់ក្នុងភូមិ ត្រូវជនមិនស្គាល់មុខវាយក្បាលអោយរបួសជាង ១ ខែមកហើយ នៅល្ងាចថ្ងៃទី២៦ ខែកុម្ភៈ ឆ្នាំ២០១៥ ជនរងគ្រោះឈ្មោះ វន វិន បានលបវាយឈ្មោះ ឌី វាសនា ពីក្រោយខ្នងបណ្តាលអោយដាច់ខ្សែក ពេលកំពុងអង្គុយហូបសាច់កណ្តុរ ។ ពេលនោះ ឈ្មោះ សេក ឆុំ ចូលឃាត់ត្រូវឈ្មោះ វន វិន ដាល់បាក់ធ្មេញ និងហើមដៃជើងផងដែរ ។ ដោយឡែក នៅម៉ោង១៧រសៀល ថ្ងៃទី២៧ ខែកុម្ភៈ ឆ្នាំ២០១៥ ឈ្មោះ វន វិន ស្រវឹងស្រា និងបក្សពួកមានច្រវ៉ាទូក និងកន្ត្រៃបាននាំគ្នាទៅវាយ សេន សុភា កំពុងមើលគេលេងបាល់ទះ ពេលនោះ ក៏មានការវាយប្រតប់គ្នា ឈ្មោះ វន វិន ប្រហែលដួលប៉ះ និងគ្រែអ្នកលក់នុំ ឬបង្គោលសសរតារាងបាល់ទះ (ព្រោះក្រុមឈ្មោះ ភា កំពុងមើលគេវាយបាល់ទះគ្មានដំបងនៅដៃទេ) ក្រោយមកអ្នកស្រុកចូលឃាត់ និងដឹកជនរងគ្រោះទៅសង្គ្រោះ ។
ក្រុមសង្ស័យបានអោយដឹងថា ពេលនោះ ពួកខ្លួនបានវាយតប់គ្នាមែន ប៉ុន្តែមិនបានប្រើដំបងវាយជនរងគ្រោះវិញទេ ចំពោះការបែកក្បាលឈនរងគ្រោះ រហូតដល់ស្លាប់ មិនដឹងនរណាជាអ្នកវាយទេ ។
លោក យឿម ប៊ុនលឿប អធិការស្រុកឯកភ្នំ បានបញ្ជាក់ថា ក្រុមជនសង្ស័យ ៣ នាក់ ដែលឃាត់ខ្លួនក្នុងនោះម្នាក់រងរបួសធ្ងន់ ហើយក្រុមសង្ស័យត្រូវកសាងសំណុំរឿងបញ្ជូន ទៅស្នងការដ្ឋាននគរបាលខេត្ត ចាត់ការតាមផ្លូវច្បាប់ ៕
