ខេត្ដកំពង់ស្ពឺ ៖ អង្គរក្សអ្នកធំបើកបររថយន្តលើសល្បឿនកំណត់ ពេលនគរបាលចរាចរណ៍ ផាកពិន័យចំនួនចំនួន១២០០០រៀល បើករថយន្តចេញបានប្រហែល ៥ ម៉ែត្រ ដកកាំភ្លើងខ្លីបាញ់គំរាមនគរបាលចរាចរណ៍៣៣គ្រាប់រួចបើកគេចខ្លួនបាត់ធ្វើអោយមានការភ្ញាក់ផ្អើលកាលពីវេលាម៉ោង ១០និង១០នាទីព្រឹកថ្ងៃទី២៨ ខែកុម្ភៈ ឆ្នាំ២០១៥ នៅតាមបណ្ដោយផ្លូវជាតិលេខ៤ ក្នុងសង្កាត់ សុពណ៌ទេព ក្រុងច្បារមន ខេត្ដកំពង់ស្ពឺ ។
លោក លី ចាន់ថន នាយផ្នែកនគរបាលចរាចរណ៍ផ្លូវគោក ខេត្ដកំពង់ស្ពឺបានឱ្យដឹងថាមុនពេលកើតហេតុ កម្លាំង នគរបាល ចរាចរណ៍ខេត្ដកំពង់ស្ពឺ ៨នាក់ ដាក់កម្លាំងត្រួតពិនិត្យការធ្វើចរាចរណ៍តាមដងផ្លូវជាតិលេខ៤ ក្រោយមកមានរថយន្ដស៊េរីទំនើប ម៉ាកមែក សឺដេស ពណ៌ខ្មៅ មួយគ្រឿងពាក់ស្លាកលេខ ភ្នំពេញ 2AD-2229 បើកបរក្នុង ពីខេត្ដព្រះសីហនុ ឆ្ពោះមករាជធានីភ្នំពេញ ក្នុងល្បឿន ៩០គីឡូម៉ែត្រក្នុងមួយម៉ោង ។ ដោយឃើញការបើកបរលើសល្បឿនកំណត់ ក្នុងទីប្រជុំជន កំណត់ត្រឹម៣០ទៅ៤០ គីឡូម៉ែត្រ ក្នុងមួយម៉ោងនោះ មន្ដ្រីនគរបាលចរាចរណ៍ ក៏បានចេញស្ទាក់រថយន្ត ហើយធ្វើការអប់រំ និងផាកពិន័យ ចំនួន១២០០០រៀល ។ក្នុងរថយន្តគេឃើញមានបុរស២នាក់ អង្គុយខាងមុខ ស្លៀកពាក់ឯកសណ្ឋាន ជាអង្គរក្ស ដោយឡែកកៅអីខាងក្រោយ គេមើលមិន ឃើញជានរណានោះទេ ដោយសារកញ្ចក់រថយន្ដបិត ស្កុតពណ៌ខ្មៅ ។ពេលផាកពិន័យរួចរថយន្តបើកចេញប្រហែល៥ម៉ែត្រក្រុមអង្គរក្សបានដកកាំភ្លើងខ្លី បាញ់ គំរាមនគរបាលចរាចរណ៍ ធ្វើឱ្យមានការភ្ញាក់ផ្អើល ប្រជាពលរដ្ឋនិង អ្នកដំណើរ រួចក៏បានបើករថយន្តចាកចេញបាត់ទៅ ក្រោយពីពិនិត្យសំបកគ្រាប់កាំភ្លើងឃើញមាន ៣៣ គ្រាប់ ។
លោកលី ចាន់ថន បានបញ្ជាក់ថាកម្លាំងកំពុងធ្វើការស្រាវជ្រាវ តាមរកម្ចាស់ រថយន្ដ ដើម្បីចាត់ការទៅតាមនីតិវិធីច្បាប់ ព្រោះកម្ពុជា ជាប្រទេសមានច្បាប់និងគោរព ច្បាប់ ទម្លាប់ត្រឹមត្រូវមិនបណ្ដោយឱ្យជន មានអំណាចយកកាំភ្លើងមកបាញ់បោះ ស្រេចតែអំពើចិត្ដ ដូចសម័យសង្គ្រាមនោះ ទេ ។
សាធារណជនរិះគន់ថា ទោះជាសមត្ថ កិច្ចនគរបាល ចរាចរណ៍ធ្វើខុសតិចតួចក្តី ក្នុងនាមយើងជាអ្នកមានមិនត្រូវបញ្ចេញកំហឹងបែបនេះទេ បើយើងគោរពច្បាប់ល្អ នរណាទៅចាប់ផាកពិន័យ ដូច្នេះសមត្ថកិច្ចគួរស្វែងរកចាប់ជនសង្ស័យ ដែលប្រើអាវុធខុសច្បាប់មកដាក់ទោស ដើម្បីអោយសង្គមមានសន្តិសុខពិតប្រាកដ ៕
