តាមប្រភពពីប្រជាពលរដ្ឋ ក្នុងក្រុងសិរីសោភ័ណ ខេត្តបន្ទាយមានជ័យ បានឲ្យដឹងថា មួយរយៈពេលកន្លង ទៅនេះគ្រឿង ចក្រក្រុមហ៊ុន របស់លោក ភ្លន់ តារា បានធ្វើសកម្មភាព ជីកកកាយដី ស្រះបុរាណរបស់ រដ្ឋមួយកន្លែង នៅខាងក្រោយ សាលាក្រុងសិរីសោភ័ណ ដោយគ្មានញញើត ច្បាប់អ្វីទាំងអស់ ។ មន្ត្រីរាជការនៅ សាលាក្រុងសិរីសោភ័ណ មួយចំនួនបានឲ្យដឹងថា សកម្មភាពជីកកាយ ស្រះបុរាណនោះ មានដាក់កម្លាំងយោធា មកយាម កាម យ៉ាងច្រើន ផងដែរ ព្រោះខ្លាច ប្រជាពលរដ្ឋនៅ ក្នុងតំបន់នោះធ្វើកា រតវ៉ា។ បញ្ហានេះលោក គោ ស៊ុំសារឿត អភិបាលខេត្តបន្ទាយមានជ័យត្រូវចាត់វិធានការទប់ស្កាត់ជាបន្ទាន់ ព្រោះសកម្មភាពប្រើគ្រឿងចក្រកាយដីស្រះបុរាណរបស់លោក ភ្លន់ តារា មេបញ្ជាការសឹករងខេត្តបន្ទាយមានជ័យ គឺជាអំពើខុសច្បាប់។
លោក ភ្លន់ តារា មេបញ្ជាការយោធាតំបន់ប្រតិបត្តិការសឹករងខេត្តបន្ទាយមានជ័យ ល្បីល្បាញខាងប្រើអំណាចប្រព្រឹត្តអំពើពុករលួយគួរឲ្យស្អប់ខ្ពើមបំផុត ដោយសារអាងខ្នងបង្អែកយ៉ាងរឹងមាំនៅក្រសួងការពារជាតិចាំជួយការពារ គ្រប់ពេលវេលា។ ជាក់ស្តែងកន្លងមកមាននាយទាហាននិងពលទាហានរាប់សិបនាក់ដាក់ពាក្យ បណ្តឹងទៅអង្គភាពប្រឆាំងអំពើពុករលួយដើម្បីឲ្យចាត់វិធានការលើលោក ភ្លន់ តារា ទាក់ទងទៅនឹងការប្រព្រឹត្តអំពើពុករលួយជាច្រើនករណី ជាពិសេសការកេងប្រវ័ញ្ចនិងគាបសង្កត់មន្ត្រីយោធាក្រោមឱវាទ។ ប៉ុន្តែរហូតមកដល់ពេលនេះទាំងក្រសួងការពារជាតិនិងអង្គភាពប្រឆាំង អំពើពុករលួយមិនទាន់ចាត់វិធានការលើមន្ត្រីពុករលួយរូបនេះនៅទ្បើយទេ ហេតុនេះហើយទើបលោក ភ្លន់ តារា នៅតែបន្តធ្វើអ្វីៗស្រេចតែអំពើចិត្តរបស់ខ្លួនដោយគ្មានខ្លាចក្រែង អ្វីទាំងអស់។
ប្រភពពីប្រជាពលរដ្ឋរស់នៅក្នុងតំបន់ក្បែរស្រះ បុរាណនោះបានឲ្យ ដឹងថា ក្រុមហ៊ុនរបស់លោក ភ្លន់ តារា បានប្រើគ្រឿងចក្រកាយស្រះបុរាណកាយយកដីលក់អស់រយៈពេលជាង១សប្តាហ៍ មកហើយពុំមានសមត្ថកិច្ចណាចាត់វិធានការទប់ស្កាត់នៅទ្បើយ មិនដឺងហេតុអ្វីបានជាមន្រ្តីពាក់ពន្ទ័មិនឃើញមកបង្រ្កាបរឺមន្រ្តីទាំងអស់នោះត្រូវថ្នាំសន្ដំអស់ហើយមើលទៅ ។ ករណីនេះក្រសួងរ៉ែនិងថាមពលដែលមានលោក ស៊ុយ សែម ជារដ្ឋមន្ត្រីត្រូវពិនិត្យមើលផងដែរ ព្រោះលោក ភ្លន់ តារា អាងអំណាចជាមេបញ្ជាការយោធាខេត្តបន្ទាយមានជ័យ កំពុងប្រើអំណាចបំផ្លាញស្រះបុរាណតាមអំពើចិត្តដោយគ្មាន ញញើតច្បាប់អ្វីទាំងអស់។ ជាពិសេសលោក ប៉ុល សារឿន អគ្គមេបញ្ជាការនៃកងយោធពលខេមរភូមិន្ទត្រូវចាត់វិធានការទៅលើលោក ភ្លន់ តារា មេបញ្ជាការយោធាខេត្តបន្ទាយមានជ័យជាបន្ទាន់ ដើម្បីកុំឲ្យមន្ត្រីយោធារូបនេះប្រព្រឹត្តខុសច្បាប់តាមអំពើចិត្ត ៕
