ខេត្តរតនគិរីៈ ផ្សារបានលុងខេត្តរតនគិរី ត្រូវអាជីវករជាច្រើនរយអ្នកបានលើកគ្នាតវ៉ាខណៈពេលដែលឯកឧត្តម ប៊ុន ប៉ុនណារិទ្ធ អគ្គនាយករងនៃអគ្គនាយកដ្ឋានទ្រព្យសម្បត្តិរដ្ឋ ក្រសួងសេដ្ឋកិច្ច និងហិរញ្ញវត្ថុចុះមកពិនិត្យសកម្មភាពជុំវិញផ្សារនៅព្រឹកថ្ងៃទី០៤ ខែកុម្ភៈ ឆ្នាំ២០១៥ នេះ។
អាជីករជាច្រើនរយនាក់បានតវ៉ាសុំឲ្យអាជ្ញាធរក្រុងបញ្ចប់ការយក ភាស៊ីដីជុំវិញផ្សារ និងដី១១០x៥៤ម៉ែត្រ ដែលចំណាររបស់សម្តេចនាយករដ្ឋមន្ត្រី។ ខណៈពេលតវ៉ានោះផងដែរ អាជីវករទាំងអស់ក៏បានដាក់កំហិតដល់លោកជា គង់ ដែលជាអ្នក ម៉ៅការសំរាមឈប់ឲ្យប្រមូលភាស៊ី ពីអាជីវករតទៅទៀត។ ពីព្រោះលោកជា គង់ គ្មានសិទ្ធិប្រមូលភាស៊ីពីដែនវិនិយោគរបស់ផ្សារឡើយ ហើយលោកជា គង់ នេះ ច្រើនតែយកអាជ្ញាធរក្រុងមកនិយាយប្រាប់អាជីវករធ្វើអោយអាជីវករដែល គ្នាមិនសូវចេះច្បាប់ក៏ចេះតែបង់ភាស៊ីឲ្យគាត់ទៅ។
នៅពេលឯកឧត្តម ប្រតិភូចុះមកតាមពាក្យស្នើសុំអន្តរាគមន៍របស់អាជីវករ ដែលចុះនៅថ្ងៃទី១៤ ខែវិច្ឆិកា ឆ្នាំ២០១៤ និងពាក្យបណ្តឹងរបស់ឧកញ៉ា សា លាង កាលពីថ្ងៃទី២៤ ខែវិច្ឆិកា ឆ្នាំ២០១៤។ ឯកឧត្តមក៏ចុះមកដល់ផ្សារបានលុងពិនិត្យមើលសកម្មភាព និងពិនិត្យមើលក្រដាស់ផ្ញើកង់ម៉ូតូ និងរថយន្តរបស់ក្រុងដែលបានប្រមូលភាស៊ីនោះ ហើយក៏បានដេញដោលសួរដល់មន្ត្រីសាលាក្រុងផងដែរ មន្ត្រីសាលាក្រុងក៏មិនសហការជាមួយគណៈប្រតិភូនេះទេ ហើយក៏បានបន្តថា បើសិនគណៈប្រតិភូចង់ដឹងពីការយកភាស៊ីនេះសូមទៅសួរលោកចៅហ្វាយក្រុង ទៅ មន្ត្រីសាលាក្រុងធ្វើដូចនេះហាក់បីដូចជាគ្មានសុជីវធម៌បន្តិសោះ។
គណៈប្រតិភូក៏បានលើកឡើងផងដែរថា ក្រដាស់ផ្ញើកង់ម៉ូតូ និងរថយន្ត ដែលចេញដោយគ្មានឆ្លងកាត់មន្ទីរសេដ្ឋកិច្ចនិងហិរញ្ញវត្ថុ គឺគ្មានប្រសិទ្ធភាពប្រមូលភាស៊ីលើដែនដីរបស់រដ្ឋឡើយ ។ ឯកឧត្តមក៏បានបន្តថាសូមអាជ្ញាធរដែលជាអ្នកទទួលភាស៊ីពីការប្រមូល បញ្ឈប់ជាបន្ទាន់ រង់ចាំការដោះស្រាយនៅពេល ក្រោយ ។
បើយោងតាមសំដីរបស់មន្ត្រីសាលាក្រុងបានប្រាប់អ្នកយកព័ត៌មានថា ការយកភាស៊ីនេះគឺសាលាក្រុងជាអ្នកឲ្យយក ដោយឡានមួយតម្លៃ៥ពាន់រៀល និងម៉ូតូ១តម្លៃ៥រយរៀល។
សូមបញ្ជាក់ផងដែរថា ការប្រមូលភាស៊ីនេះចាប់តាំងពីថ្ងៃទី២៤ ខែមករា ឆ្នាំ២០១៥ រហូតដល់បច្ចុប្បន្ននេះតើលោកចៅហ្វាយក្រុងប្រមូលភាស៊ីអស់ទាំងនេះយក ថវិការធ្វើអ្វីខ្លះ។ បន្ទាប់ពីគណៈប្រតិភូបានចេញទៅ លោក ពែក សំណាង អភិបាលរងក្រុងក៏បានប្រមានដល់អាជីវករថា កុំរញ៉េរញ៉ៃពេកប្រយ័ត្នខ្លួនផង ក្រុមអាជីវករផ្សារបានលុង រឿងខាងលើនេះទុកអោយក្រុមហ៊ុនផ្សារ និងសាលាក្រុងដោះស្រាយគ្នា៕
ជីវ៉ា
