បាត់ដំបង ៖ នាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋាននគរបាលអន្តោប្រវេសន៍ និងប្រធានក្រុមការងារ ស្រុកបាណន់បានចុះជួបសួរសុខទុក្ខពលករ ពលការិនី៣ពាន់នាក់ផ្តល់អង្ករម្នាក់១៥គីឡូក្រាមនិងថវិកា ៣០០០០ រៀល កាលពីល្ងាចថ្ងៃទី២១ មិថុនានៅវត្តជុំគិរីភូមិអូរពងមាន់ឃុំតាគ្រាមស្រុកបាណន់។
នាយឧត្តមសេនីយ៍ សុខ ផល បាននិយាយថា តាងនាមរាជរដ្ឋាភិបាលកម្ពុជានិងក្រសួងស្ថាប័ន អាជ្ញាធរ អង្គភាព ក្រុមហ៊ុន អង្គការ និងសប្បុរសជននានា រួមទាំងអគ្គនាយកដ្ឋាននគរបាលអន្តោប្រវេសន៍ ជាពិសេស សម្តេចអគ្គសេនាបតីតេជោ ហ៊ុន សែន នាយយករដ្ឋមន្ត្រីនៃព្រះរាជាណាចក្រកម្ពុជាបានយកចិត្តទុកដាក់ គ្រប់យ៉ាងចំពោះពលករខ្មែរ ដែលត្រូវរបបយោធាថៃចាប់បង្ខំបញ្ជូន មាតុភូមិនិវត្តន៍។រាជរដ្ឋាភិបាលបានផ្ដល់សេវាទទួលនិងដឹកជញ្ជូនពលករ ពីច្រកព្រំដែនទៅគោលដៅខេត្តនានា ដោយជិះរថយន្តឥតយកប្រាក់ និងទទួលបានអាហារ ទឹក ថ្នាំសង្កូវ និងសេវាដទៃទៀត។
នាយ ឧត្តមសេនីយ៍ សុខ ផល បានបញ្ជាក់ថា ពលករជាង ៣ ពាន់នាក់ ដែលមានផ្ទះនៅក្នុងឃុំទាំង ៨ នៃស្រុកបាណន់ នៅថ្ងៃនេះ ត្រូវបានក្រុមការងារចុះសួរសុខទុកគ្រប់ឃុំនិងផ្តល់អំណោយសំរាប់ ដោះទាល់ស្មើគ្នាអង្ករម្នាក់១៥គីឡូក្រាមនិងថវិកា៣០០០០រៀល ។ សម្តេចអគ្គសេនាបតីតេជោ ហ៊ុន សែន នាយយករដ្ឋមន្ត្រី នៃព្រះរាជាណាចក្រកម្ពុជាបានយកចិត្តទុកដាក់ខ្លាំង ប្រជុំពិភាក្សាទាំងយប់ ចំពោះការធ្វើប័ណ្ណឆ្លងដែនស្របច្បាប់ ដល់ពលករខ្មែរ និងសិស្សដោយកំណត់បង់ប្រាក់តែ ៤ ដុល្លា ក្នុងម្នាក់ដែលកន្លងមក ការធ្វើប័ណ្ណឆ្លងដែនុមានតម្លៃជាង១០០ដុល្លា ។
ជាចុងក្រោយនាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋាននគរបាលអន្តោប្រវេសន៍ និងប្រធានក្រុមការងារ ស្រុកបាណន់ បានអំពាវនាដល់ពលករ ពលការិនីទាំង អស់ដែលចង់ត្រឡប់ទៅធ្វើការងារនៅប្រទេសថៃវិញ ត្រូវបំពេញបែបបទ និងធ្វើប័ណ្ណឆ្លងដែនស្របច្បាប់ ជៀសវាងការធ្វើបានពីថៅកែ ឬពីរដ្ឋាភិបាលថៃកាន់កាប់ដោយរបបយោធា ៕
