ឧត្តរមានជ័យ ៖ បុរសម្នាក់ជាយោធាមានស្រីស្នេហ៍ ប្រពន្ធតាមទាន់បាញ់ចំនួន ៣ គ្រាប់ ស្លាប់ពេលសំរាកព្យាបាលនៅមន្ទីរពេទ្យ ម៉ោង ៩ និង ៤០ នាទី យប់ថ្ងៃទី៣០ ខែធ្នូ ឆ្នាំ២០១៤ ។
ហេតុកាបាញ់ប្តីកាលពីវេលាម៉ោង១០និង៣០នាទី ព្រឹកថ្ងៃទី៣០ ខែធ្នូ ឆ្នាំ២០១៤ នៅចំណុចបន្ទាយសឹករង ភូមិត្រពាំង៣ ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ ក្រោយពីកើតហេតុស្ត្រីដៃដល់ជាប្រពន្ធបានគេចខ្លួនបាត់ ។
នគរបាលស្រុកត្រពាំងប្រសាទបានអោយដឹងថា បុរសរងគ្រោះស្លាប់មានឈ្មោះ ណែម វ៉ាង អាយុ២៨ឆ្នាំ ជាយោធា រីឯប្រពន្ធជាជនដៃដល់មានឈ្មោះ ធារី អាយុ២៩ឆ្នាំ មានទីលំនៅក្នុងភូមិកើតហេតុ ។ វត្ថុតាងកាំភ្លើងអាកាស្វាយបត់របស់ប្តី ។
ប្រភពសាក្សីបានអោយដឹងថា មុនពេលកើតហេតុជនរងគ្រោះបាននាំស្រីស្នេហ៍ទៅបន្ទាយ (វេនយាម) ខណៈនោះប្រពន្ធបានជិះម៉ូតូទៅដល់បន្ទាយ ស្រាប់តែប្តីនិងស្រីស្នេហ៍ឃើញពីចំងាយនាំគ្នារត់ពួន។ មួយសន្ទុះក្រោយមក ស្រាប់តែប្តីបានត្រឡប់មកវិញ ចេញមុខជួបប្រពន្ធនិងលុតជង្គង់អង្វរប្រពន្ធដោយសន្យាឈប់ធ្វើខុសទៀត ប៉ុន្តែភ្លើងកំហឹងប្រច័ន្ទមិនស្ងប់រលត់ នាងជាប្រពន្ធឃើញកាំភ្លើងអាការស្វាយបត់នៅក្នុងរថយន្តប្តីក៏ស្ទុះទៅវាយបំបែកកញ្ចក់យកកាំភ្លើងមកភ្ជង់ប្តី ។ ពេលភ្ជង់កាំភ្លើងនិយាយចចារគ្នាមិនត្រូវ ហើយប្តីមានបំណងស្ទុះចូលចាប់យកកាំភ្លើង ក៏ត្រូវនាងបាញ់ចំនួន៣គ្រាប់ផ្ទួនៗ ត្រូវបណ្តាលរបួសធ្ងន់ដួលនៅកន្លែងកើតហេតុ ភ្លាមៗនោះស្ត្រីដៃដល់ជាប្រពន្ធបានឡើងម៉ូតូជិះគេចខ្លួនបាត់តែម្តង ។
ក្រោយពីកើតហេតុ សមត្ថកិច្ចនគរបាលចុះទៅដល់កន្លែងកើតហេតុ ដើម្បីធ្វើកោសវិច័យនិងដឹកជនរងគ្រោះទៅកាន់មន្ទីរពេទ្យធ្វើការសង្គ្រោះ លុះយប់ឡើង ទទួលព័ត៌មានពីមន្ទីរពេទ្យ និងសាច់ញាតិជនរងគ្រោះថា ឈ្មោះ ណែម វ៉ាង ដែលប្រពន្ធបាញ់នោះបានស្លាប់បាត់ទៅហើយ ។ បច្ចុប្បន្នសមត្ថកិច្ចកំពុងស្វែងរកតាមចាប់ខ្លួនស្ត្រីសង្ស័យ យកមកផ្តន្ទាទោសទៅតាមផ្លូវច្បាប់ ៕
ព្រំសំ
