ខេត្តប៉ៃលិន ៖ ស្ត្រីម្នាក់ដែលសង្ស័យជាចោរលួចប្រាក់ ក្នុងក្រុមហ៊ុនកាស៊ីណូម្គុដពេជ្រ ចំនួន៦២៥០០០បាត(ប្រាក់ថៃ) ត្រួវបានកម្លាំងកងរាជអាវុធហត្ថខេត្ត ចុះឃាត់ខ្លួន តាមពាក្យបណ្តឹងរបស់ប្រធានក្រុមហ៊ុន ។ ហេតុការចុះឃាត់ខ្លួននេះ បានកើតឡើង កាលពីវេលាម៉ោង៨និង៣០នាទីព្រឹក ថ្ងៃទី២២ ខែធ្នូ ឆ្នាំ២០១៤ ស្ថិតនៅក្នុងកាស៊ីណូ ម្គុដពេជ្រ ភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ស្ត្រីដែលជាជនសង្ស័យមានឈ្មោះ គីម ឆេន ភេទស្រី អាយុ៦០ឆ្នាំ ជាអ្នកចាក់បៀរ, មានស្រុកកំណើតនៅខេត្តបាត់ដំបង ។ បច្ចុប្បន្នរស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
បើតាមប្រធានក្រុមហ៊ុន បានឲ្យដឹងថា៖ ដោយមានការសង្ស័យពីប្រាក់ក្នុងក្រុមហ៊ុន គាត់បានឲ្យបុគ្គលិកឆែកកាម៉េរាសុវត្ថិភាពមើល ក៏ឃើញឈ្មោះគីម ឆេន ដែលជាជនសង្ស័យ រួចបានឲ្យសន្តិសុខឃាត់ខ្លួន ហើយប្តឹងសមត្ថកិច្ចកងរាជអាវុធហត្ថខេត្តតែម្តង ។
លោក ស៊ិន តាំ នាយការិយាល័យស្រាវជ្រាវបទល្មើសព្រហ្មទណ្ឌ នៃបញ្ជាការដ្ឋានកងរាជអាវុធហត្ថខេត្តប៉ៃលិន បានឲ្យដឹងថា៖ ក្រោមការបញ្ជាពីលោក នង វណ្ណនី ប្រធានមន្ទីរស្រាវជ្រាវ និងយុត្តិធម៌ នៃបញ្ជាការដ្ឋានកងរាជអាវុធហត្ថខេត្ត និងតាមពាក្យបណ្តឹងរបស់ក្រុមហ៊ុន លោកក៏បានដឹកនាំកម្លាំងផ្ទាល់ ចុះទៅកន្លែងកើតហេតុ ព្រមទាំងឃាត់ខ្លួនមកបញ្ជាការដ្ឋានកងរាជអាវុធហត្ថខេត្ត ។ ស្ត្រីដែលជាជនសង្ស័យ បានឆ្លើយសារភាពថា៖ ខ្លួនបានលួចប្រាក់នៅក្នុងការិយាល័យ អគ្គនាយកក្រុមហ៊ុនម្គុដពេជ្រ ចំនួន២ដង គឺលើកទី១ នៅថ្ងៃទី១៨ ខែធ្នូ ឆ្នាំ២០១៤ មានចំនួន២២៥០០០បាត់(២សែន២ម៉ឺន៥ពាន់បាត) ប្រាក់ថៃ ហើយលើកទី២ នៅថ្ងៃទី២១ ខែធ្នូ ឆ្នាំ២០១៤ នៅកន្លែងដដែល ចំនួនទឹកប្រាក់៤សែនបាត (ប្រាក់ថៃ) ។
បច្ចុប្បន្ន ស្ត្រីដែលជាជនសង្ស័យត្រួវបានកម្លាំងកងរាជអាវុធហត្ថខេត្ត បញ្ជូនខ្លួន ព្រមទាំងសំណុំរឿង ទៅតុលាការ នៅល្ងាចថ្ងៃទី២៣ ខែធ្នូ ឆ្នាំ២០១៤ ដើម្បីចាត់ការតាមនីតិវិធីច្បាប់ ៕
រិទ្ធ ចំរើន
