បាត់ដំបង៖ បុរសម្នាក់រត់ម៉ូតូឌុបរកប្រាក់ចាយមិនគ្រប់ជួយយួរថ្នាំញៀនលក់បន្ត១លើក២លើកមិនអីសំណាងល្អ កាន់យួរថ្នាំញៀនចំនួន២០គ្រាប់លក់ លើកទី៤ ត្រូវកម្លាំងនគរបាលស្រុកកំរៀងឃាត់ខ្លួនបញ្ជូនទៅស្នងការដ្ឋាននគរបាលខេត្ត នារសៀលថ្ងៃទី២៦ ខែធ្នូ ឆ្នាំ២០១៤ចាត់ការតាមផ្លូវច្បាប់ ។
ជនសង្ស័យត្រូវកម្លាំងនគរបាល ស្រុកកំរៀងនឃាត់ខ្លួន កាលពីវេលាម៉ោង៣និង២០នាទី រសៀលថ្ងៃទី២៥ ខែធ្នូ ឆ្នាំ២០១៤ ពីបទកាន់កាប់រក្សាទុក សារធាតុញៀន នៅចំណុចបរិវេណវត្តគិរីរតនៈ ស្ថិតក្នុងភូមិស្វាយ ឃុំបឹងរាំង ស្រុកកំរៀង ។
លោក ស្រី វុឌ្ឍី អធិការរង នគរបាលស្រុកកំរៀង បានឱ្យដឹងថា បុរសសង្ស័យ ដែលសមត្ថកិច្ចឃាត់ខ្លួន មានឈ្មោះ ស៊យ ឃន អាយុ ៤១ឆ្នាំ មុខរបរ រត់ម៉ូតូឌុប រស់នៅភូមិកើតហេតុខាងលើ។វត្ថុតាងដកហូតបានមានថ្នាំញៀនប្រភេទយ៉ាម៉ាចំនួន២០គ្រាប់។
បុរសសង្ស័យបានឆ្លើយសារភាពថា ខ្លួនពិតជាបានកាន់ថ្នាំញៀនឱ្យគេ បានចំនួន៤លើកមកហើយ និងបានទទួលបានកម្រៃខ្លះ គ្រាន់ចាយប៉ុណ្ណោះ។
លោក សុខ និមល នាយផ្នែកនៃការិយាល័យប្រឆាំងគ្រឿងញៀនខេត្តបានពិនិត្យថ្នាំញៀន ២០ គ្រាប់និងធ្វើតេសអោយជនសង្ស័យបង្ហាញពីលទ្ធផលតេសថ្នាំញៀន ។ បន្ទាប់ពីសាកសួរបន្ថែម រួចកសាងសំណុំរឿងបញ្ជូនជនសង្ស័យនិងវត្ថុតាងទៅតុលាកាចាត់ការតាមនិតិវិធី ៕
