ប៉ៃលិន ៖ ប្រជាពលរដ្ឋក្រុងប៉ៃលិនថា លោក ឌិន កឹម ប្រធានមន្ទីរសាធារណការជួសជុលផ្លូវគ្មានគុណភា ពធ្វើអោយរួចពីដៃ ពីខែវិច្ឆិកា ឆ្នាំ២០១៤ ដល់ថ្ងៃ២៣ ខែធ្នូ ឆ្នាំ២០១៤ ខូចអស់វិញ ។
ប្រជាពលរដ្ឋថា ផ្លូវជាតិ១ខ្សែពីរង្វង់មូលវិមានឯករាជ្យ ដល់ភូមិតាង៉ែនលើសង្កាត់ប៉ៃលិន ក្រុងប៉ៃលិន មានការខូចខាតជាដំណំ មានកន្លុកជាច្រើនកន្លែង មិនទាន់ឃើញជួសជុលឡើងវិញទេ ។ ចំណែកផ្លូវខាងលើនេះ បានខាងមន្ទីរសាធារណការជួសជុលក្នុងភូមិប៉ាហ៊ីត្បូងដល់រង្វង់មូលវិមានឯករាជ្យម្តង កាលពីខែវិច្ឆិកា ឆ្នាំ២០១៤ ដល់ថ្ងៃ២៣ ខែធ្នូ ឆ្នាំ២០១៤ ខូចអស់វិញ ប៉ុន្តែការជួសជុលនេះ គ្មានគុណភាព ដោយមានការកិបកេងថ្មនិងកៅស៊ូចាក់ស្រាលៗមិនតាមស្តង់ដា ទើបមិនបាន ២ ខែស្រួលបួលផង ត្រូវរបើកអស់វិញ ។
បច្ចុប្បន្នផ្លូវជាតិ ១ ខ្សែខាងលើនេះ ការធ្វើចរាចរណ៍អាចជួបការលំបាក មិនត្រឹមបង្កអោយខូចម៉ូតូទេ អាចបង្កអោយមានគ្រោះថ្នាក់ ចរាចរណ៍ផងដែរ ដោយការគេចជង្ហុកជៀសគ្នាមិនរួច ។ ប្រជាពលរដ្ឋធ្លាប់លើកបញ្ហាសាងសងផ្លូវលំ និងជួសជុលផ្លូវដល់មន្ទីរសាធារណការណ៍ តែលោក ឌិន កឹម ប្រធានមន្ទីរចេះតែសន្យាចោលពន្យាពេលយូរទើបអនុវត្តន៍ ។
ពាក់ព័ន្ធករណីនេះ លោក ឌិន កឹម ប្រធាន មន្ទីរសាធារណការ និងដឹកជញ្ជូន មិនលើកទទួលទូរស័ព្ទអ្នកយកព័ត៌មានសុំការបំភ្លឺឡើយ ៕
