ខេត្តត្បូងឃ្មុំ ៖ កាលពី ថ្ងៃទី១៨ ខែធ្នូ ឆ្នាំ២០១៤ វេលា ម៉ោងប្រមាណ ៥ទៀបភ្លឺ សេចក្តីរាយការណ៍ ពីប្រជាពលរដ្ឋ បានឱ្យដឹងថា មានរថយន្តភ្លៅ ៥ មួយគ្រឿង ដែលគេដឹងថាជារបស់ អ៊ុក ទ្រា និង ផេង ឆុន សម្រុកដឹកឈើខុសច្បាប់ឡើងក្រឡាប់ចេញឈើសុក្រំ នាងនួន ស្រឡៅ ក្បែរច្រកទន្លេចាម មិនរំលងមេព្រៃ និងសមត្ថកិច្ចតាមដងផ្លូវសោះ ហើយបានបន្លំជាមួយ ក្បួនរថយន្តដឹកឈើ របស់លោកឧកញ៉ា លឹម ប៊ុណ្ណាហៅ ខ្នា បានក្រឡាប់ នៅចំណុចភូមិជ្រៃឡើង ឃុំជាំរវៀង ស្រុកមេមត់ ខណៈបម្រុងដឹកឈើចេញ តាមច្រកទន្លេចាម យកទៅលក់ឱ្យ ឈ្មួញនៅប្រទេសវៀតណាម ។
ប្រភពមួយបានបង្ហើបថា រថយន្តដឹកឈើគ្មានច្បាប់ ដែលក្រឡាប់នេះ គឺជារបស់លោក អ៊ុក ទ្រា មានតួនាទី ជាមេបញ្ជាការរង តំបន់ប្រតិបត្តិការសឹករងមេមត់ និងលោក ផេង ឆុន មានតួនាទី ជានាយរងប៉ូលិស ច្រកព្រំដែនកោះថ្ម ហើយឈ្មួញដែលជ្រក ក្រោមស្បែកកម្លាំងប្រដាប់អាវុធ ទាំង ២នាក់នេះ គឺជាមេឈ្មួញឈើ និងជាមនុស្សជំនិត របស់លោកឧកញ៉ា លឹម ប៊ុណ្ណា ហៅ ខ្នា នោះតែម្តង ទើបគ្មានសមត្ថកិច្ច ណាមួយហ៊ានទៅក្បែរ និងសួរនាំឡើយ។
បើតាមសេចក្តីរាយការណ៍ បានបញ្ជាក់ថា រថយន្តដឹកឈើ ដែលក្រឡាប់នោះ ដឹកសុទ្ធសឹងតែឈើសុក្រំ ហើយពុំមានច្បាប់នោះទេ ពោលគឺរថយន្តមួយនេះ បានដឹកអែបតាមពីក្រោយ រថយន្តដឹកឈើរបស់លោកឧកញ៉ា លឹម ប៊ុណ្ណា ហៅ ខ្នា ចំនួន ២គ្រឿងទៀត ដែលមានច្បាប់ នាំចេញឈើប្រភេទលេខ២។
មានការបញ្ចាក់ផងដែរថា លោក អ៊ុក ទ្រា គឺជាមេបញ្ជាការ តំបន់ប្រតិបត្តិការសឹករងស្រុកមេមត់ និងលោក ផេង ឆុន ដែលជានាយរងប៉ូលិសច្រកព្រំដែនកោះថ្ម ដែលតែងប្រើឈ្មោះទាហានឈ្មួញទៅកាងការរកស៊ី ដឹកជញ្ជូនឈើ ខុសច្បាប់ ជាយូរមកហើយ ។
ដោយពេលខ្លះលួចអែបជាមួយ ក្បួនឡានដឹកឈើរបស់ លោកឧកញ៉ា លឹម ប៊ុណ្ណា ហៅ ខ្នា ហើយពេលខ្លះទៀត ឱ្យមេការស្ពាយលុយ យកទៅបង់ឱ្យសមត្ថកិច្ច និងមន្ត្រីជំនាញតាមដងផ្លូវ ពោលគឺលោក អ៊ុក ទ្រា និងលោក ផេង ឆុន មិនដែលក្រែងញញើត ចំពោះការរឹតបន្តឹង របស់ថ្នាក់លើ ម្តងណាឡើយ ។
ពាក់ព័ន្ធនឹងបញ្ហានេះដែរ សារព័ត៌មានយើងបានទំនាក់ទំនងសុំការបំភ្លឺពីលោក អ៊ុក ទ្រា និងផេង ឆុន ដែរ ប៉ុន្តែគ្មានអ្នកទទួលសោះឡើយ ។/
