ខេត្តប៉ៃលិន ៖ប្រ ពន្ធសពបុរសម្នាក់បានអះអាងនៅមុខមនុស្សជាច្រើននៅមន្ទីរពេទ្យបង្អែកខេត្តថា ប្តីស្លាប់ដោយកម្មករដូចគ្នាកាប់នៅវង់ផឹកស៊ី សមត្ថកិច្ចនគរបាលស្រុកសាលាក្រៅ កាលពីថ្ងៃទី៨ខែធ្នូឆ្នាំ២០១៤ ស្រាវជ្រាវឃើញសពស្លាប់ ដោយគ្រោះថ្នាក់ចរាចរណ៍ជិះម៉ូតូបុកពីក្រោយគោយន្ត ។
កាលយប់ថ្ងៃទី៦ ខែធ្នូ ឆ្នាំ២០១៤ ពេលរថយន្តសង្គ្រោះដឹកជនរងគ្រោះឈ្មោះ គង់ ប៊ុនធា អាយុ៣១ឆ្នាំមកដល់មុខមន្ទីរពេទ្យបង្អែកខេត្តដាច់ខ្យល់ស្លាប់ ។ ស្ត្រីម្នាក់ឈ្មោះ សាន ភា អាយុ២៣ឆ្នាំ និងមានកូនស្រីម្នាក់ឈ្មោះ គង់ ភាចំប៉ី អាយុជិត ២ ឆ្នាំមានទីលំនៅភូមិទួលឃុំសាលាក្រៅស្រុក សាលាក្រៅ បានប្រាប់អ្នកសារព័ត៌មាន និងសមត្ថកិច្ចនិងមនុស្សជាច្រើនអ្នកថា ប្តីរបស់ខ្លួនត្រូវក្រុមកម្មករដកដំឡូងដូចគ្នាកាប់ បណ្តាលអោយគ្រោះថ្នាក់ដល់ស្លាប់ ព្រោះប៉ុន្មានថ្ងៃមុនពេលកើតហេតុ ក្រុមកម្មករនិងប្តីរបស់ខ្លួនបានឈ្លោះប្រកែកគ្នា ។
ក្រោយពីទទួលដំណឹងនេះ កម្លាំងនគរបាលស្រុកសាលាក្រៅចុះស្រាវជ្រាវ ស៊ើបដល់ចំការដំឡូង ហើយបន្តមកផ្ទះបុរសម្នាក់ជាម្ចាស់គោយន្តកន្ត្រៃ មានឈ្មោះ ឆុន ឈូ អាយុ៣១ឆ្នាំ ភូមិទំនាប ឃុំស្ទឹងត្រង់ ស្រុកសាលាក្រៅ ។ ម្ចាស់គោយន្តបានប្រាប់ថា កាលម៉ោង៦និង៤៥នាទី ខែធ្នូ ឆ្នាំ២០១៤ បុរសរងគ្រោះស្រវឹងស្រាបើកម៉ូតូពីកើតទៅលិច ក្នុងល្បឿនលឿន ហើយពេលនោះ ទំនងចាប់ហ្វ្រាំងមិនជាប់ ឬក៏ចាប់ហ្វ្រាំងអូសមកបុកគោយន្តខ្លួនពីក្រោយ បណ្តាលអោយដួលបែកចិញ្ចើម សន្លប់ស្តូកស្តឹង ។ ខ្លួនបានលើកជនរងគ្រោះ និងម៉ូតូដាក់លើគោយន្តដឹកសំដៅមកផ្ទះខ្លួន ហើយឆែកទូរស័ព្ទហៅប្រពន្ធជនរងគ្រោះអោយហៅរថយន្តសង្គ្រោះមកដឹកប្តីយកទៅសង្គ្រោះនៅមន្ទីរពេទ្យ ព្រោះភ្លាមនោះ មិនបាននិយាយហេតុផលអ្វីទេ ។
ក្រោយពីការស្រាវជ្រាវ សមត្ថកិច្ចបានបញ្ជាក់ថា ជនរគ្រោះស្លាប់ដោយគ្រោះថ្នាក់ចរាចរណ៍មិនមែនជារឿងឃាតកម្មឡើយ ហើយបានយកគោយន្ត និងម៉ូតូទៅរក្សាទុកនៅអធិការដ្ឋានស្រុក រងចាំធ្វើការដោះស្រាយជាក្រោយ ៕
