ប៉ៃលិន ៖ កម្លាំងនគរបាលចម្រុះនៃស្នងការដ្ឋាននគរបាល ខេត្ដប៉ៃលិនស្រាវជ្រាវ ឆែកឆេរ ជនជាតិចិន ២ នាក់ រឿងបន្លំប្រាក់ ២៥០ ដុល្លា ពីអាជីវករលក់មាស រកឃើញថ្នាំញៀនម្សៅហេរ៉ូអ៊ីន ២ កញ្ចប់ស្មើ ៧,០៧ ក្រាម នៅក្នុងបន្ទប់ផ្ទះសំណាក់ត្បូងទទឹម កាលពីម៉ោង១៩យប់ ថ្ងៃទី២៧ ខែវិច្ឆិកា ឆ្នាំ២០១៤ ស្ថិតនៅ ក្នុងភូមិអូតាពុកលើ សង្កាត់ប៉ៃលិន ក្រុងប៉ៃលិន ។
លោក ក្រិច ទៀង នាយរងការិយាល័យកណ្តាលយុត្តិធម៌នៃស្នងការដ្ឋាននគរបាល ខេត្ដប៉ៃលិន បានអោយដឹងថាជនជាតិចិនសង្ស័យទាំង២នាក់ដែលឃាត់ខ្លួន ទី១. ឈ្មោះ Huang Chang Zhong ហួងចាងស៊ុង អាយុ៣៦ឆ្នាំ កាន់លិខិតឆ្លងដែនលេខ G ៤២៨២៣៣០១ និងទី២. ឈ្មោះ Huang Xiaode ហងចាវទ័រអាយុ៤០ឆ្នាំ កាន់លិខិតលេខ G ៣៧៨៧៥៩២៣ ។វត្ថុតាងដកហូតបានមានថ្នាំញៀន២កញ្ចប់ស្មើ៧,០៧ ក្រាម។
ស្ត្រីអាជីវករដូរលុយបានអោយដឹងថា ៖ មុនពេលកើតហេតុមានជនជាតិចិន២នាក់បានយកលុយបាត ទៅដូរយកលុយខ្មែរ នៅផ្ទះដូរលុយមួយកន្លែង នៅផ្សារប៉ៃលិន។ តែត្រូវបានអ្នកដូរលុយប្រាប់ថា អត់មានលុយខ្មែរគ្រប់ទេ ត្រូវគិតជាលុយដុល្លារវិញ។ ក្រោយមកអ្នកដូរលុយបានហុចលុយដុល្លារទៅជនជាតិចិន ហើយជនជាតិចិនបានកាន់លុយដុល្លារក្នុងដៃ រួចនិយាយថា គេអត់យកលុយដុល្លារទេ យកលុយខ្មែរវិញ។រួចឡើងជិះម៉ូតូចេញទៅ ខ្លួនម្ចាស់លុយ បានរាប់ឃើញបាត់២៥០ដុល្លារ ភ្លាមនោះដេញតាមទៅដល់ ផ្ទះសំណាក់ ហើយក៏បានបកមកប្តឹងនគរបាលឲ្យជួយអន្តរាគមន៍។ ពេលសមត្ថកិច្ចចូលទៅផ្ទះសំណាក់ ក៏បានឃើញជនជាតិចិនទាំង២នាក់បានបោះថ្នាំញៀន ចូលក្នុងធុងសំរាម ហើយក៏ឃាត់ខ្លួនយកទៅសួរនាំ។
ជនសង្ស័យទាំង២នាក់ប្រាប់ សមត្ថកិច្ចថាថ្នាំញៀនទាំងនេះពួកគេ នាំមកពីខេត្តសៀមរាប ទុកសំរាប់ប្រើប្រាស់ផ្ទាល់ខ្លួន មិនមែនសំរាប់លក់ដូរទេ ។
លោក នាយរងបានបញ្ជាក់ថា ជនសង្ស័យទាំង២នាក់និងវត្ថុតាងថ្នាំញៀន ត្រូវបានកំពុងរៀបចំឯកសារ កសាងសំណុំរឿងបញ្ជូនទៅតុលាកានារសៀលថ្ងៃទី២៨ចាត់ការតាមផ្លូវច្បាប់ ៕
