ខេត្តប៉ៃលិន ៖ ប្រកួតកីឡាបាល់ទាត់មិត្តភាពអន្តរជាតិ រវាងគយនិងរដ្ឋាករខេត្តប៉ៃលិន(កម្ពុជា) និងគយខេត្តច័ន្ទបូរី (ប្រទេសថៃ) ខាងកីឡាកម្ពុជាឈ្នះកីឡាថៃ ៣ ទល់និង ១ ដែលពានរង្វាន់ឆ្នាំ៣០១៤ បានទៅលើកីឡាបាល់ទាត់កម្ពុជា កាលពីល្ងាចថ្ងៃទី២៥ ខែវិច្ឆិកាឆ្នាំ២០១៤ នៅទីស្នាក់ការសាខាគយ និងរដ្ឋាករខេត្តប៉ៃលិន ។
ទីស្នាក់ការសាខាគយ និងរដ្ឋាករខេត្តប៉ៃលិន មានទីធ្លាធំល្វឹងល្វើយនិងមានដំណាំហូបផ្លែ ការចិញ្ចឹមសត្វគ្រប់ប្រភេទ ដែលជាសិល្បៈសំរាប់ទាក់ទងអ្នកវិនិយោគ ភ្ញៀវជាតិនិងអន្តរជាតិ ជាពិសេសភ្ញៀវប្រទេសថៃ ដែលមន្ទីរទាំងអស់នៅខេត្តប៉ៃលិនមិនទាន់អាចធ្វើបាន ។
លោក អ៊ុក វណ្ណច័ន្ទ ប្រធានទីស្នាក់ការសាខាគយ និងរដ្ឋាករខេត្តប៉ៃលិន បានអោយដឹងថា ក្នុងឱកាសប្រកួតកីឡាបាល់ទាត់មិត្តភាពអន្តរជាតិ រវាងគយនិងរដ្ឋាករខេត្តប៉ៃលិន (កម្ពុជា) និងគយខេត្តច័ន្ទបូរី (ប្រទេសថៃ) កម្លាំងគយ និងរដ្ឋាករខេត្តចាន់បូរីបាននាំថ្នាំពេទ្យ និងសម្ភារៈសិក្សា និងថវិកាមួយចំនួនមកចែកជួនសិស្សានុសិស្ស លោកគ្រួអ្នកគ្រួ ប្រមាណជិត២៥០នាក់ ។ ជារៀងរាល់ឆ្នាំ រូបលោកតែងធ្វើទំនាក់ទំនងល្អជាមួយគយប្រទេសថៃ ដើម្បីជួយសម្រួលការងារទំនិញចេញចូល អោយប្រជាពលរដ្ឋរកស៊ីប្រកបរបរចិញ្ចឹមជីវិតបានស្រួល មិនតែប៉ុណ្ណោះ បានប្រប្រមូលពន្ធជូនរដ្ឋបានច្រើនជាងឆ្នាំមុនកើនឡើងជាលំដាប់ ។ ពីមុនតម្រូវការពន្ធ១ត្រីមាស៤៥០លានរៀល ប្រមូលមិនបាន តែពេលរាជរដ្ឋាភិបាលមានកំណែទម្រង់ការប្រមូលពន្ធបាន៣៩៩០លានរៀល ក្នុង១ត្រីមាស នេះដោយសារបងប្អូនអាជីវករគាត់យល់ដឹងពីការបង់ពន្ធដារចូលរដ្ឋ ។
លោក អ៊ុក វណ្ណច័ន្ទ ប្រធានសាខាគយ និងរដ្ឋាករខេត្តប៉ៃលិន បានបន្តថា កម្លាំងគយនិងរដ្ឋាករសាខា ខេត្តចាន់បូរីប្រទេសថៃ ដែលមានលោក ផុងថេប ផួសាប់ (Pongthap Bousub) ជាប្រធានសាខាគយ និងរដ្ឋាករខេត្តចាន់បូរី ប្រទេសថៃ ដែលទើបបានផ្លាស់មកកាន់តំណែងថ្មី បានដឹកនាំកម្លាំងមន្ត្រីដឹកនាំគយចំនួន៤៥នាក់ បានមកចូលរួមប្រកួតកីឡាបាល់ទាត់ជាមិត្តភាពរវាងកម្លាំងគយកម្ពុជា ដើម្បីរឹតចំណងសាមគ្គីភាព បន្តកិច្ចសហប្រតិបត្តិការរវាងច្រកទ្វារអន្តរជាតិច្រកតំបន់នៅតាម ព្រំដែនកម្ពុជា ថៃ ។ ការប្រកួតកីឡានេះ មិនមែនជាការប្រកួតជ្រើសរើសយកទៅប្រកួតថ្នាក់ជាតិ ឬថ្នាក់អន្តរជាតិឡើយ គឺគ្រាន់តែប្រកួតជាមិត្តភាពទេ ។
លោក ផុងថេប ផួសាប់ (Pongthap Bousub) បានមានប្រសាសន៏ថា កម្លាំងសាខាគយនិងរដ្ឋាករខេត្តចាន់បូរី បានមករឹតចំណងកិច្ចសហប្រតិបត្តិការរវាងប្រទេសទាំង២ ។ ពិសេសគឺការប្រកួតកីឡាបាត់ទាត់មិត្តភាពនេះ គឺដើម្បីស្គាល់គ្នានិងពង្រឹងពង្រីកបន្តកិច្ចសហប្រតិបត្តិការ រវាងច្រកទ្វារអន្តរជាតិនិងច្រតំបន់នៅជាប់ព្រំដែនក្នុងខេត្ត បន្ទាយមានជ័យ ខេត្តបាត់ដំបង ខេត្តពោធិសាត់ និងបន្តទំនាក់ទំនងល្អជាមួយគ្នា ។ លោកបានបញ្ជាក់ថា កីឡាករគយកម្ពុជាបានទទួលជ័យលាភីឈ្នះ ៣ ទល់ ១ លើកម្លាំងគយថៃ ។ ទោះបីយ៉ាងណា គឺជាការសមគ្គីភាពទំនាក់ទំនងល្អ ជាមួយគ្នាតែប៉ុណ្ណោះ។
លោក កើត សុធា អភិបាលខេត្តប៉ៃលិន បានមានប្រសាសន៏ ក្រោយពីការប្រកួតបាត់ទាត់ត្រូវបានបញ្ចប់នោះ គឺកម្លាំងសាខាគយកម្ពុជាបានឈ្នះ៣ទល់១ទទួលជ័យលាភីពានរង្វាន់ពី ប្រទេសថៃ ។ លោក កើត សុធា បានបន្តថា ការប្រកួតកីឡាបាល់ទាត់នេះ គឺជាការប្រកួតមិត្តភាព រវាងកម្លាំងសាខាគយខេត្តចាន់បូរី ដើម្បីពង្រឹងពង្រីកសាមគ្គីភាពនិបន្ត កិច្ចសហប្រតិបត្តិការរវាងច្រកអន្តរៈជាតិនិងច្រកតំបន់ជាប់ព្រំដែន កម្ពុជា-ថៃ (មានខេត្តបន្ទាយមានជ័យ ខេត្តបាត់ដំបង ខេត្តប៉ៃលិន ខេត្តពោធិសាត់) ។
ចុងក្រោយ គឺបានចូលរួមហូបអាហារសាមគ្គី និងមានការរាំលេងកំសាន្តជាមួយគ្នាផងដែរ ៕
