ខេត្តប៉ៃលិន ៖ កាស៊ីណូម្កុដពេជ្របើកអោយប្រជាពលរដ្ឋខ្មែរចូលលេងយ៉ាងគគ្រឹកគគ្រេង ជារៀងរាល់ថ្ងៃដោយមិនខ្វល់អំពីច្បាប់ហាមឃាត់របស់រាជរដ្ឋាភិ បាលឡើយ ភ្ញៀវដែលចូលទៅលេងក្នុងកាស៊ីណូនោះ គេសង្កេតឃើញជាជនជាតិខ្មែរមកពីក្រុងបាត់ដំបងនិងស្រុកបវេលខេត្តបាត់ដំបងនិងក្រុងប៉ៃលិន ហើយពួកគេលេងចាញ់បញ្ចាំរថយន្តនៅកាស៊ីណូក៏មាន ហើយប្លង់ដីស្រែចំការបញ្ចាំនៅអង្គការក៏មានគ្មានសល់អ្វីសោះ ។
ប្រភពអ្នកចូលលេងបានបញ្ជាក់ថា ជនជាតិខ្មែរដែលតែងចូលលេងល្បែងក្នុងកាស៊ីណូដោយសារចង់ឈ្នះចាញ់ច្រើន មិនចង់លេងល្បែងភ្នាល់ក្នុងភូមិចាញ់ឈ្នះតិច ម្យ៉ាងទៀត ពេលលេងនៅស្រុកភូមិសមត្ថកិច្ចឧស្សាហ៍ចុះចាប់ពេក លេងមិនសប្បាយចិត្តសោះ ។ ការមកលេងកាស៊ីណូមានសន្តិសុខល្អពេលចូលលេងឈ្នះតែថ្ងៃដំបូងទេ ថ្ងៃបន្ទាប់គឺចាញ់រហូត មិនតែប៉ុណ្ណោះរថយន្តបានបញ្ចាំនៅកាស៊ីណូទៀត អ្នកខ្លះបញ្ជាំដីស្រែនៅអង្គការព្រោះតែចង់សប្បាយនៅកាស៊ីណូ និងចង់ហូបម្ហូបព្រីរបស់កាស៊ីណូ។
សូមបញ្ជាក់ថា កន្លងទៅថ្មីៗនេះ រាជរដ្ឋាភិបាល បានចេញសារាចរណែនាំស្ដីពីការហាមឃាត់មិនអនុញ្ញាតឲ្យប្រជាពលរដ្ឋខ្មែរចូលលេងល្បែងក្នុងកាស៊ីណូនានា នៅក្នុងប្រទេសឡើយ ហើយបានកោះហៅម្ចាស់កាស៊ីណូទៅប្រជុំ ថែមទាំងព្រមានដកអាជ្ញាប័ណ្ណរាល់ក្រុមហ៊ុនកាស៊ីណូទាំងឡាយ ណា ដែលមិនបានគោរពតាមសារាចរណែនាំនេះទៀតផង ។
យោងតាមសារាចរណែនាំរបស់រាជរដ្ឋាភិបាល ខាងលើនេះ ក្រសួងសេដ្ឋកិច្ចនិងហិរញ្ញវត្ថុ ក៏បានចេញសេចក្ដីជូនដំណឹងមួយលេខ០១៤ ចុះថ្ងៃទី០៤ កក្កដា ឆ្នាំ២០១៤ ដែលចុះហត្ថលេខាដោយលោកអូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ហើយតាមបណ្ដាមន្ទីរក្រោមឱវាទក៏បានផ្ដល់សេចក្ដីជូនដំណឹងនេះ បន្តទៅដល់ក្រុមហ៊ុនកាស៊ីណូនានា ដើម្បីបានជ្រាប និងអនុវត្តផងដែរ ។ ប៉ុន្តែរហូតមកដល់ពេលនេះ ម្ចាស់កាស៊ីណូមួយចំនួនហាក់មិនបានគោរពឬយកចិត្តទុកដាក់ចំពោះ ច្បាប់នេះឡើយ ។
ជាពិសេសម្ចាស់កាស៊ីណូម្កុដពេជ្រមិនដឹងមិនឮនូវសេចក្ដីជូនដំណឹងរបស់ក្រសួងសេដ្ឋកិច្ចនិងហិរញ្ញវត្ថុ ឬសារាចរណែនាំរបស់រាជរដ្ឋាភិបាលឬក៏ធ្វើមិនដឹង ទើបបើកទ្វារចំហទទួលភ្ញៀវខ្មែរឲ្យចូលលេងល្បែងយ៉ាងគគ្រឹកគគ្រេងបែបនេះ ។នៅច្រកទ្វារចូលខាងមុខនៃកាស៊ីណូនីមួយៗ គេឃើញមានបិទសេចក្ដីជូនដំណឹងមួយច្បាប់របស់ក្រសួងសេដ្ឋកិច្ច និងហិរញ្ញវត្ថុ ដែលមានយោងនូវខ្លឹមសារសារាចរណែនាំរបស់រាជរដ្ឋាភិបាល ស្ដីពី«ការហាមឃាត់មិនអនុញ្ញាតឲ្យជនជាតិខ្មែរចូលលេងល្បែង កាស៊ីណូ» ប៉ុន្តែផ្ទុយទៅវិញ ពេលចូលទៅដល់ខាងក្នុងកាស៊ីណូ គេបានឃើញភ្ញៀវដែលកំពុងភ្នាល់ល្បែងគ្រប់បែបយ៉ាង ជាជនជាតិខ្មែរ ។
តើលោក កើត សុធា អភិបាលខេត្តប៉ៃលិនឡើងកាន់តំណែងថ្មី អាចបង្ក្រាបករណីនេះបានទេ ដើម្បីជួយទប់ស្កាត់ភាពក្រីក្ររបស់រាស្ត្រដែលងប់ចាញ់ល្បែងនៅកាស៊ីណូនេះ ឬក៏ចង់ផ្តួចផ្តើមយកលោក ឡោ ស៊ុនជាង ថៅកែកាស៊ីណូម្កុដពេជ្រនេះ មកធ្វើការជាមួយទៀត ៕
ដោយនាយម៉ូក
