រាជធានីភ្នំពេញ ៖ ឃាតកបានឈរជំទែងបាញ់ជា ច្រើនគ្រាប់ ទៅលើលោកឧកញ៉ា អ៊ឹង ម៉េងជឺ បណ្តាលឲ្យស្លាប់ភ្លាមៗនៅនឹងកន្លែងកើតហេតុ ខណៈជនរងគ្រោះ ចុះពីលើរថយន្តបម្រុងដើរចូល ទិញផ្លែឈើ កាលពីម៉ោង ៧និង១៥ នាទីយប់ ថ្ងៃទី២២ ខែវិចិ្ឆកា ឆ្នាំ២០១៤ នៅចំណុចមុខហាង លក់ផ្លែឈើយីហោ ឡោតិចសេង ផ្ទះលេខ៤៦៤BE0 ផ្លូវលេខ២៧៤ ស្ថិតក្នុងសង្កាត់ ទួលស្វាយព្រៃ២ ខណ្ឌចំការមន រាជធានីភ្នំពេញ។
ឧកញ៉ា អ៊ឹង ម៉េងជឺ អាយុជាង ៣០ឆ្នាំ ជាថៅកែស៊ីម៉ងត៍សញ្ញាពេជ្រ និងជាថៅកែ លក់គ្រឿងសំណង់ មានប្រពន្ធជាថៅកែ ហាងពេជ្រហុងកុង ត្រូវជនសង្ស័យ ២ នាក់ ជាខ្មាន់កាំភ្លើងបើកម៉ូតូ មកក្បែរបាញ់ជាច្រើនគ្រាប់ បណ្តាលឱ្យស្លាប់នៅនឹង កន្លែងកើតហេតុ ។
នៅថ្ងៃកើតហេតុ លោកឧកញ៉ា អ៊ឹង ម៉េងជឺ បើករថយន្តម៉ាកតូយ៉ូតា ឡិចស៊ីស៥៧០ ពណ៌ឈាមជ្រូក ពាក់ស្លាកលេខ ភ្នំពេញ 2M-1683 ពណ៌ក្រហម មួយគ្រឿង តែម្នាក់ឯង តាមបណ្តោយផ្លូវលេខ២៧៤ ពេលមកដល់មុខហាង លក់ផ្លែឈើ ឡោតិចសេង ជនរងគ្រោះបានចុះ ពីលើរថយន្ត ។ ពេលទើបតែចុះពីរថយន្ត ក៏ត្រូវខ្មាន់កាំភ្លើង ២នាក់ ជិះម៉ូតូហុងដា ឌ្រីមសេ១២៥ មួយគ្រឿងមកដល់ ឈប់អែបជនរងគ្រោះ បានដកកាំភ្លើងខ្លី ម៉ាកឡុក CZ98 បាញ់ជនរងគ្រោះ ចំនួន ១០ គ្រាប់ បណ្តាលឱ្យស្លាប់ភ្លាម នៅនឹងកន្លែងកើតហេតុ ។ ដោយឡែក ជនសង្ស័យទាំង ២ នាក់ បានបើកម៉ូតូគេចខ្លួន បាត់ស្រមោល ។
បន្ទាប់ពីនោះ សមត្ថកិច្ចចម្រុះខណ្ឌចំការមន បានចុះមកអន្តរាគមន៍ និងធ្វើកំណត់ហេតុ ដើម្បីឈានទៅកំណត់មុខសញ្ញា ជនសង្ស័យខាងលើ។ តាមការសន្និដ្ឋាន ជាជំហានដំបូង សមត្ថកិច្ចជំនាញ សន្និដ្ឋានថា អាចជាករណីគំនុំ និងបានគិតទុកជាមុន ។
សពលោកឧកញ៉ា អ៊ឹង ម៉េងជឺ ត្រូវបានយកទៅកម្តល់ ធ្វើបុណ្យនៅគេហដ្ឋាន នៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
