នៅក្នុងឱកាសបិទបញ្ចប់ការប្រណាំងទូកក្នុងឆ្នាំ២០១៤នេះ ព្រះបាទ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានយាងទត និងព្រះប្រទានពានរង្វាន់កិត្តិយសដល់ទូកដែលទទួលបានជ័យ លាភីនៅក្នុងការប្រណាំងរយៈពេលបីថ្ងៃនេះ កាលពីល្ងាចថ្ងៃទីសុក្រទី ០៧ វិច្ឆិកា ។
ព្រះបាទ នរោត្តម សីហមុនី បានយាងព្រះប្រទានរង្វាន់ជានិមិត្តរូបដល់តំណាងទូកអុំ ទូកចែវ និង ទូកមានសោភ័ណ្ឌភាពចំនួន៨ នៅក្នុងផែនទីមួយ។ ព្រះអង្គបានព្រះប្រទានដល់តំណាងទូកនីមួយៗនូវពានមួយ ទង់អនុស្សាវរីយ៍បុណ្យអុំទូកមួយ ប័ណ្ណមួយ និងថវិកាចំនួន៤០ម៉ឺនរៀល ។ ទាំងនេះ គឺជាពានរង្វាន់សម្រាប់ទូកនៅក្នុងផែនទីមួយ។
លទ្ធផលជាផ្លូវការនៃការប្រណាំងទូករយៈពេលបីថ្ងៃនេះ គឺផែនទីមួយមានទូកចំនួន ១១៩ ទូក ផែនទីពីរមានចំនួន៤៨ទូក ផែនទីបីមានទូកចំនួន៣២ទូក និងផែនទីបួនមានចំនួន១៦ទូក។ ជាមួយគ្នានោះ ទូកពិសេសដែលមានល្បឿនលឿនជាងគេបំផុតនៅក្នុងឆ្នាំ២០១៤ មានចំនួន៣ទូក ដោយមួយមកខេត្តកំពង់ចាម និងពីរទៀត មកពីខេត្តតាកែវ។ ចំណែកទូកដែលមានសោភ័ណ្ឌភាពស្អាតជាងគេវិញ មានចំនួន៤ទូក ដែលមួយនៅក្នុងរាជធានីភ្នំពេញ មួយមកពីខេត្តបាត់ដំបង និងពីរទៀតមកពីខេត្តកំពង់ឆ្នាំង។
ចំពោះទូកនៅក្នុងផែនទីពីរទទួលបានពានមួយ ទង់អនុស្សាវរីយ៍បុណ្យអុំទូកមួយ ប័ណ្ណមួយ និង ទឹកប្រាក់ចំនួន៣៥ម៉ឺនរៀល។ ចំពោះទូកនៅក្នុងផែនទីបី និង ទីបួន គឺទទួលបានពានរង្វាន់ដូចគ្នា តែខុសគ្នាលើចំនួនទឹកប្រាក់ ដោយផែនទីបីទទួលបាន៣០ម៉ឺនរៀល និង ផែនទីបួនទទួលបាន២៥ម៉ឺនរៀល។
លោក ប៊ូ ជុំសេរី អនុរដ្ឋលេខាធិការក្រសួងអប់រំយុវជននិងកីឡា និងជាប្រធានគណះកម្មការមេប្រយោគនៃការប្រណាំងទូក បានប្រកាសឲ្យដឹងថា សម្រាប់ប្រភេទទូកខ្នាតអន្តរជាតិសម្រាប់បុរស ចំណាត់ថ្នាក់ផែនលេខ ១ មានចំនួន១១ទូក លេខ២ មាន១៧ទូក លេខ ៣មាន១៥ទូក និង លេខ ៤មាន ៥ទូក ។ ចំពោះទូកខ្នាតអន្តរជាតិផែនលេខ ១ មាន១ទូក ។ ប្រភេទទូកអុំបុរសផែនលេខ ១ មាន១១៩ទូក លេខ ២មាន៤៨ទូក លេខ ៣មាន៣២ទូក និង លេខ ៤មាន១៦ទូក ។ ប្រភេទទូកអុំនារីផែនលេខ ១មាន១ទូក ។ទូកចែវ បុរសផែនលេខ ១មាន៦ទូក លេខ ២មាន៩ទូក លេខ ៣មាន៨ទូក និងផែនលេខ ៤មាន ៧ទូក ។
ឯទូកពិសេសដែលលឿនជាងគេក្នុងរយៈពេល៣ថ្ងៃនេះលេខ ១ទូកឈ្មោះស្រីស្រស់គៀនជ័យបារមីតេជោរបស់ខេត្តកំពង់ចាម ដែលរយៈពេល៣ថ្ងៃធ្វើក្នុងថេរវេលា២៧នាទី១០វិនាទី១៧វិនាទី ។ លេខ ២ទូកឈ្មោះច័ន្ទសោមសែនមង្គលរបស់ខេត្តតាកែវ ថេរវេលា២៧នាទី១៤វិនាទី៣៥ និង លេខ ៣ទូក របស់ខេត្តតាកែវដែរឈ្មោះ គីរីវង់សុខសែនជ័យថេរវេលា២៧នាទី២៤វិនាទី៤៥ ។
សូមបញ្ជាក់ថា ។ កាលពីថ្ងៃចាប់ផ្តើមប្រណាំងទូកដំបូង ព្រះបាទនរោត្តម សីហមុនី និង សម្តេចម៉ែ ក៏បានព្រះប្រទានដល់កីឡាករ ចំណុះទូកទាំងអស់ក្នុងម្នាក់នូវក្រមា មួយ និង ប្រទានទឹកប្រាក់ពីរសែនរៀល ដល់ទូកនីមួយៗផងដែរ ។ ចំណែកនៅថ្ងៃទីបីនេះមានទូកចូលរួមប្រណាំងចំនួន២៤១ទូក និង មានកីឡាករចំណុះទូកចំនួនជាង១ម៉ឺន៧ពាន់នាក់ ៕
