ខេត្តរតនគិរី ៖ កាលពីថ្ងៃទី៣០ ខែតុលា ដល់ថ្ងៃទី០១ ខែវិច្ឆិកា ២០១៤ លោក ស៊ី កយ នាយរងប៉ុស្តិ៍ច្រករបៀង ភូមិឡុំ និងគួកន ឃុបឃិតជាមួយកងកម្លាំងការពារព្រំដែនប្រទេសវៀតណាម លួចដឹកឈើក្រហម ចំនួនជាង ៦០កំណាត់ ឆ្លងដែនតាមដី របស់ក្រុមហ៊ុន អភិវឌ្ឍន៍ ចំការកៅស៊ូ៧៤ ត្រង់ចំណុចK3 ហើយនេះក៏មិនមែន ជាលើកទីមួយ នោះដែរ។
សេចក្តីរាយការណ៍ពីកងកម្លាំងរាជអាវុធហត្ថ ស្រុកអូរយ៉ាដាវ បានឱ្យដឹងថា នៅត្រង់ចំណុចកើតហេតុ កម្លាំងរាជអាវុធហត្ថ ស្រុកអូរយ៉ាដាវ សុំសហការចាប់ឈើក្រហម ជាង ៦០កំណាត់នោះដែរ តែលោក ស៊ី កយ នាយរងប៉ុស្តិ៍ច្រករបៀង បានប្រាប់ថា កម្លាំងរបស់លោក និងចាប់ឈើនោះ ហើយព្រមទាំងធ្វើកំណត់ហេតុ បញ្ជូនទៅឱ្យរដ្ឋបាលព្រៃឈើ ចាត់ការបន្ត។
លោក ស៊ី កយ បានបញ្ជាក់អោយដឹងទៀតថា នៅយប់ថ្ងៃទី៣០ ខែតុលា ពេលនោះ កម្លាំងកងរាជអាវុធហត្ថ បានដកមកវិញ នៅសល់តែកម្លាំង ការពារព្រំដែន តែប៉ុណ្ណោះ ហើយនៅព្រឹកថ្ងៃទី៣១ ខែតុលា មានកម្លាំងយោធា វៀតណាម ៥ទៅ៦ នាក់ ប្រដាប់ដោយអាវុធ ឃើញដូច្នេះគាត់មិនហ៊ានឃាត់នោះទេ ពីព្រោះឈើទាំងអស់នោះ នៅជាប់ខ្សែក្រវ៉ាតព្រំដែន និងខ្លាចផ្ទុះអាវុធដាក់គ្នា ហើយវៀតណាម ក៏ប្រមូលយកទៅបាត់។
ដោយឡែកលោក សុខ មីន មេបញ្ជាការ កងរាជអាវុធហត្ថ ស្រុកអូរយ៉ាដាវ បានប្រាប់អ្នកកាសែតថា កម្លាំងរបស់លោក ក៏បានទៅដល់កន្លែង ទីតាំងស្តុកឈើ ហើយលោក ស៊ី កយ បានប្រាប់ថា កម្លាំងរបស់លោក ចាប់ហើយ ទើបកម្លាំងរបស់លោក ក៏បានដកមកវិញ ហើយលោកបានបញ្ជាក់ បន្ថែមទៀតថា កុំអោយមានបញ្ហា និងកងកម្លាំងប្រដាប់អាវុធ ហើយនៅព្រឹកថ្ងៃទី៣១ ខែតុលា វៀតណាម បានប្រមូលឈើជាង ៦០កំណាត់នោះ ទៅបាត់អស់។
ផ្ទុយទៅវិញ នៅថ្ងៃទី០១ ខែវិច្ចិកា ឆ្នាំ២០១៤ ឈើក្រហមប្រភេទសុក្រំ ដែលលោក ស៊ី កយនិងគូកនជួញដូរ តាមច្រករបៀងភូមិឡុំ ត្រង់ចំណុចK3 ដែលខ្លួនកាន់កាប់នោះ ត្រូវបានដឹកជញ្ជូន ដល់ព្រំដែនប្រទេសវៀតណាម ព្រមទាំងកងកម្លាំង ការពារព្រំដែនប្រទេសវៀតណាម ថា ខ្លួនជាអ្នកចាប់ឈើខ្មែរទៅវិញ ហើយខណៈនោះ តាមព្រំដែនប្រទេស វៀតណាមគ្មានព្រៃឈើ និងឈើ ប្រភេទនេះទាល់តែសោះ។
ទាក់ទិននិងការចោទប្រកាន់ ចំពោះការជួញដូរ ឈើប្រណិតកន្លងមក និងឈើក្រហម កាលពីថ្ងៃទី៣១ ខែតុលា តាមចំណុចK3 របស់ក្រុមហ៊ុនអភិវឌ្ឍន៍ ចំការកៅស៊ូ៧៤ នោះ លោកវរៈសេនីយ៍ឯក ងួន សុវណ្ណា មេបញ្ជាការនគរបាល ការពារព្រំដែនគោក មិនអាចសុំការបំភ្លឺ ជុំវិញបញ្ហាខាងលើនេះបានទេ ដោយសារពុំមានលេខទូរស័ព្ទ។ គេសង្កេតឃើញ មន្ត្រីនិងកងកម្លាំងខិលខូច មួយចំនួនតូច បានបន្តជួញដូរ បទល្មើសព្រៃឈើ ដើម្បីមហិច្ឆិតារបស់ខ្លួន ផ្ទុយពីបទបញ្ជាលេខ០០១។
សូមបញ្ចាក់ថា ឈើក្រហមប្រភេទសុក្រំ ចំនួនជាង ៦០កំណាត់ ដែលមានមុខកាត់ ៣០សង់ទីម៉ែត្រ ទៅ ៦០សង់ទីម៉ែត្រឃ្លុំ មានប្រវែង ២,២០ម៉ែត្រ បើគិតជាម៉ែត្រគូប ប្រហែល ១០ម៉ែត្រគូប ត្រូវបានគេកាប់ និងដឹកជញ្ជូន ចេញពីតំបន់អភិរក្ស ប្រាសាទតាក់ណាំង ក្នុងទឹកដីឃុំយ៉ាងទុង ស្រុកអូរយ៉ាដាវ។ នៅក្នុងជំនួញឈើក្រហម ប្រភេទសុក្រំនេះដែរ លោកវរៈសេនីយ៍ទោល រចំ ជីប ប្រធានប៉ុស្តិ៍ភូមិឡុំ បានប្រាប់ថា លោកជាប់រវល់ចូលរួម បុណ្យកឋិន មេបញ្ជាការព្រំដែនគោក ៕
