បាត់ដំបង ៖ បុរសម្នាក់ជាមុខសញ្ញាចាស់រកស៊ីជួញដូរគ្រឿងញៀនខុសច្បាប់ តាមតំបន់ព្រំដែនបាននាំថ្នាំញៀនយ៉ាម៉ា ៨១៣ គ្រាប់ពីស្រុកម៉ាឡៃ ខេត្តបន្ទាយមានជ័យ យកទៅស្រុកកំរៀង បម្រុងលក់អោយម៉ូយនៅប្រទេសថៃ ត្រូវកម្លាំងនគរបាលស្រុកសំពៅលូន បង្ក្រាបឃាត់ខ្លួន ក្នុងបទល្មើសជាក់ស្តែង កំពុងកាន់កាប់រក្សាទុកនូវសារធាតុញៀនខុសច្បាប់ កាលពីម៉ោង៨និង៣០នាទី ព្រឹកថ្ងៃទី៧ ខែវិច្ឆិកា ឆ្នាំ២០១៤ នៅចំណូចភូមិអណ្តូងពីរឃុំអង្គរ បានស្រុកសំពៅលូន ខេត្តបាត់ដំបង ។
លោក ពេជ្រ សារ៉ែន អធិការស្រុកសំពៅលូន បានអោយដឹងថា បុរសសង្ស័យដែលសមត្ថកចិ្ចឃាត់ខ្លួន មានឈ្មោះ ហៃ ហ៊ួរ ហៅកណ្តុរអាយុ៤០ឆ្នាំ ស្នាក់នៅភូមិអូរដាលើ ឃុំអូរដា ស្រុកកំរៀង ខេត្តបាត់ដំបង ។ វត្ថុតាងដែលដកហូតបានមានថ្នាំញៀនប្រភេទយ៉ាម៉ា៨១៣គ្រាប់ ។
ជនសង្ស័យបានសារភាពថា ខ្លួនបានទិញថ្នាំញៀនយ៉ាម៉ា ពីស្រុកម៉ាឡៃខេត្តបន្ទាយមានជ័យ ដើម្បីយកទៅលក់អោយបុរម្នាក់ឈ្មោះ ឡិច អាយុប្រហែល៤០ឆ្នាំ រស់នៅក្នុងទឹកដីថៃ ជាប់ព្រំដែនស្រុកកំរៀង ។
លោក ពេជ្រ សារ៉ែន បានបញ្ជាក់ថា ក្រោយទទួលព័ត៌មានពីបណ្តាយរាយការណ៍ថា ជនសង្ស័យជាមុខសញ្ញាចាស់ ដែលសមត្ថកិច្ចតាមព្រំដែនតាមចាប់ខ្លួនលេចមុខ ក្នុងទឹកដីស្រុកសំពៅលូន រូបលោកបានដាក់កម្លាំងស្រាវជ្រាវ កំណត់មុខសញ្ញា និងឈានដល់ការឃាត់ខ្លួនបានតែម្តង ។ បច្ចុប្បន្នបុរសសង្ស័យ និងវត្ថុតាងថ្នាំញៀនប្រភេទយ៉ាម៉ា៨១៣ គ្រាប់ កំពុងរៀបចំកសាងសំណុំរឿង ពីបទជួញដូរនូវសារធាតុញៀនខុសច្បាប់ បញ្ជូនទៅកាន់ស្នងការដ្ឋាន នគរបាលខេត្ត នាថ្ងៃទី៨ ខែវិច្ឆិកា ឆ្នាំ២០១៤ ចាត់ការតាមផ្លូវច្បាប់ ៕
