ខេត្តបន្ទាយមានជ័យ ៖ កម្លាំងនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ សហការជាមួយនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ អនុវត្តតាមបញ្ជារបស់ លោក ផាន់ ភីរម្យ ព្រះរាជអាជ្ញារងអមសាលាដំបូងខេត្តបន្ទាយមានជ័យ បង្ក្រាបចាប់ឃាត់រថយន្តយីឌុប ឈ្មោះ យាយផុន មេឈ្មួញដឹកទំនិញមិនបង់ពន្ធចូលរដ្ឋម៉ឺនដុល្លា និងមានបង្គាប់ឈើប្រណិតទៀតផង កាលពីវេលាម៉ោង១០ ព្រឹក ថ្ងៃទី៥ ខែវិច្ឆិកា ឆ្នាំ២០១៤នៅ ភូមិគោកស្វាយ ឃុំប្ញស្សីក្រោក ស្រុកមង្គលបុរី ខេត្តបន្ទាយមានជ័យ ។ហើយទំនិញទាំងនោះដឹក ចេញពីប្រទេសថៃតាមច្រកតំបន់ព្រំដែនស្រុកម៉ាឡៃ ខេត្តបន្ទាយមានជ័យ ។
សមត្ថកិច្ចលួចបង្ហើបប្រាប់ឱ្យដឹងទៀតថា រថយន្តដឹកទំនិញគេចពន្ធរបស់យាយផុនមានប្រភេទទំនិញគ្រឿងបន្លាស់រថយន្ត ប្រេងម៉ាស៊ីន គ្រឿងគោយន្ត និង ប្រភេទទំនិញជាច្រើនមុខទៀត ហើយមិនបានបង់ពន្ធចូលរដ្ឋ បណ្តាលអោយបាត់បងចំណូលរដ្ឋរងយ៉ាងច្រើន ។ ដូច្នេះក្រោយទទួលព័ត៌មានរាយការណ៍ពីបណ្តាញសម្ងាត់
សមត្ថកិច្ចជំនាញបានស្នើរយោបល់លោកព្រះរាជអាជ្ញាអមសាលាដំបូងខេត្តបន្ទាយមានជ័យអនុវត្តន៍បង្ក្រាបរថយន្តខាងលើតែម្តង ។
បើ តាមប្រភពព័ត៌មានពីសមត្ថកិច្ចលួចបង្ហើបឱ្យដឹងទៀតថា មេឈ្មួញឈ្មោះ យាយផុន គឺជាឈ្មួញដ៏ធំម្នាក់តែងតែធ្វើសកម្មភាពរកស៊ីដឹកទំនិញចេញពី ព្រំដែនច្រកតំបន់ម៉ាឡៃ ជាយូរឆ្នាំមកហើយ ប្រើប្រាស់ក្នុងរូបភាពបង់ពន្ធចូលរដ្ឋគ្រប់ផង លួចបន្លំបង់មិនគ្រប់ផង ជួនកាលលោតឆ័ត្រមកតែម្តង គ្រាន់តែត្រូវដងត្រូវផ្លែជាមួយគយនៅច្រកម៉ាឡៃ ហើយជាការស្រេច ។
បើ តាមសេចក្តីរាយការណ៍ពីសមត្ថកិច្ចលួចបង្ហើបឱ្យដឹងទៀតថា ក្នុងមួយថ្ងៃរថយន្តរបស់ឈ្មួញ ឈ្មោះ យាយផុន ដឹក ទំនិញចេញពីប្រទេសថៃចូលតាមច្រកតំបន់ម៉ាឡៃពី៣ទៅ៤រថយន្ត បន្ទាប់មកគេយកមក រៀបចំលើកដាក់ទំនិញឡើងរថយន្តបន្តនៅចំណុចភូមិកណ្តោល ឃុំអូរស្រឡៅ ស្រុកម៉ាឡៃ និងដឹកឆ្ពោះយកមកកាន់ខេត្តបន្ទាយមានជ័យ និងទៅភ្នំពេញ ជាដើម ។
ជុំ វិញឱ្យមានការរត់ពន្ធទំនិញនាំចូលមិនបង់ពន្ធហើយត្រូវបានសមត្ថ កិច្ចបង្ក្រាប នៅពេលនេះអ្នកយកព័ត៌មានយើងបានទំនាក់ទំនងតាមទូរស័ព្ទទៅលោក ចាប សាវ៉ាត ប្រធានស្នាក់ការការិយាល័យគយនិងរដ្ឋាករ ច្រកតំបន់ម៉ាឡៃ ឱ្យជួយឆ្លើយបំភ្លឺ ប៉ុន្តែទូរស័ព្ទរបស់លោកហៅចូល២ដង គ្មានការឆ្លើយតប ។ ចំណែក មេឈ្មួញ ឈ្មោះ យាយ ផុន រងការចោទប្រកាន់ដឹកទំនិញគេចពន្ធខាងលើ ក៏មិនអាចរកលេខទូរស័ព្ទធ្វើការទំនាក់ ឱ្យជួយឆ្លើយបំភ្លឺជុំវិញករណីនេះផងដែរ ។
ក្រោយពីបង្ក្រាប រថយន្តយីឌុបដឹកទំនិញគេចពន្ធខាងលើ ត្រូវបានគេបញ្ជូនទៅកាន់ស្នងការដ្ឋាននគរបាលខេត្ត ចាត់ការតាមផ្លូវច្បាប់ ៕
ម៉ែនចាន់តារា
