បន្ទាយមានជ័យ ៖កម្លាំងសមត្ថកិច្ចនគរបាលស្រុកស្វាយចេកចុះល្បាតតាមផ្លូវបង្ក្រាបរថយន្តនីសាន់១គ្រឿងដឹកឈើគ្រញូងសរុបចំនួន៥២ដុំស្មើទម្ងន់១៦០គីឡូក្រាម ឯអ្នកបើកបរគេចខ្លួនបាត់ កាលពីវេលាម៉ោង៦និង៣០នាទីល្ងាចថ្ងៃទី៤ ខែវិច្ឆិកា ឆ្នាំ២០១៤នៅលើផ្លូវលំមួយកន្លែងខាងកើតភូមិតាស្មន់ ឃុំរលួស ស្រុកស្វាយចេកខេត្តបន្ទាយ មានជ័យ។
នគរបាលស្រុកស្វាយចែកបានអោយដឹងថារថយន្តពីរបាំង១គ្រឿងពណ៌ទឹកប្រាក់ពាក់ស្លាកលេខបន្ទាយមានជ័យ 2A-0536 ធ្វើសកម្មភាពដឹកឈើគ្រញូងខុសច្បាប់ ពេលចុះល្បាតតាមផ្លូវបង្ក្រាបបានឈើគ្រញូងសរុបចំនួន៥២ដុំស្មើទម្ងន់១៦០គីឡូក្រាមហើយបញ្ជូនទៅស្នងការរដ្ឋាននគរបាលខេត្តចាត់ការ។
លោក ចាប សុផាឬទ្ធិ នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបានឱ្យដឹងនៅថ្ងៃទី៦ ខែវិច្ឆិការ នេះថាការបង្ក្រាបរថយន្តដឹកឈើគ្រញូងខាងលើសមត្ថកិច្ចមិនបានចាប់ឃាត់ខ្លួនអ្នកបើករថយន្ត នោះទេ គ្រាដែលរថយន្តបើកមកដល់ចំណុចត្រួតពិនិត្យរបស់សមត្ថកិច្ចចុះល្បាតពេលយប់ស្រាប់តែអ្នកបើករថយន្តនោះឃើញសមត្ថកិច្ចក៏បើកទ្វាររថយន្តរត់គេចខ្លួនបាត់តែម្តង និងពុំបានបង្សល់ទុកអត្តសញ្ញាណនោះឡើយ។
បច្ចុប្បន្នរថយន្តពីរបាំង១គ្រឿងពណ៌ទឹកប្រាក់ពាក់ស្លាកលេខបន្ទាយមានជ័យ 2A-0536 ធ្វើសកម្មភាពដឹកឈើគ្រញូងខុសច្បាប់បានយកមករក្សាទុកនៅស្នងការខេត្តបន្ទាយមានជ័យ ដើម្បីស្រាវជ្រាវរកម្ចាស់រថយន្ត និងម្ចាស់ឈើគ្រញូងដើម្បីនាំខ្លួនយកមកចាត់ការតាមនិតិវិធីច្បាប់ ៕
ដោយចិន្តា
