ឧត្តរមានជ័យ ៖ រថយន្តក្រុមហ៊ុនប្រេងសាំងសូគីម៉ិច ដឹកឈើគ្រញូង ដែលសមត្ថកិច្ចចម្រុះចាប់បាន លើកទី២ កាលពីវេលាម៉ោង ៦ ព្រឹក ថ្ងៃទី ២៣ ខែតុលា ឆ្នាំ២០១៤ នៅចំណុចព្រំប្រទល់ខេត្ដសៀមរាប និងខេត្តឧត្តរមានជ័យ អ្នកខ្លះថា ជារថយន្ត របស់ក្រុមហ៊ុនសូគីម៉ិច អ្នកខ្លះថា មានគេក្លែងបន្លំ ។
គួរបញ្ជាក់ផងដែរ នៅលើកទី១ រថយន្តក្រុមហ៊ុនប្រេងសាំងសូគីម៉ិចដឹកឈើគ្រញូង ត្រូវកម្លាំងនគរបាលរស្នងការដ្ឋានខេត្តឧត្តរមានជ័យបានបង្ក្រាបឃាត់ កាលពីថ្ងៃទី ១៩ ខែសីហា ឆ្នាំ២០១៤ នៅក្រុងសំរោង ខេត្តឧត្តរមានជ័យ និងដកហូតបានឈើគ្រញូងចំនួន១៦តោន និងរថយន្តមានផ្លាកសញ្ញាក្រុមហ៊ុនសូគីម៉ិចចំនួន ១ គ្រឿងពាក់ ស្លាកលេខ ភ្នំពេញ 3A-3461 បញ្ជូនទុកនៅសាលាខេត្តឧត្តរមានជ័យ ។
ជាក់ស្តែងលើកទី២ ម៉ោង៦ព្រឹក ថ្ងៃទី២៣ ខែតុលា ឆ្នាំ២០១៤ នៅចំណុចព្រំប្រទល់ ខេត្ដសៀមរាប និងស្រុកអន្លង់វែង ខេត្តឧត្តរមានជ័យ កងរាជអាវុធ ខេត្ដឧត្ដរមានជ័យ សហការជាមួយនឹងរដ្ឋបាលព្រៃឈើ ស្រុកអន្លង់វែង ក្រោមការបញ្ជាផ្ទាល់ពីលោក កូយ កាន់យ៉ា ព្រះរាជអាជ្ញា អមសាលាដំបូងខេត្ដឧត្ដរមានជ័យ បានចាប់រថយន្ដដឹក
ប្រេងសាំងសូគីម៉ិចបង្កប់ឈើគ្រញូង បានចំនួន ១គ្រឿងទៀត ជាលើកទី ២ ពាក់ស្លាកលេខភ្នំពេញ 3A-3461 ដដែលដូចលើកទី១ និងដកហូតឈើគ្រញូងជាង១០តោន ។
រថយន្ដនិងឈើគ្រញូងត្រូវយកទៅរក្សាទុកនៅសាលាខេត្តឧត្ដរមានជ័យ រង់ចាំដោះស្រាយទៅតាមផ្លូវច្បាប់ ។
ពាក់ព័ន្ធករណីនេះ ខាងភាគីក្រុមហ៊ុនប្រេងសាំងសូគីម៉ិចមិនមានការបកស្រាយ ឬរកប្តឹងអ្នកប្រព្រឹត្តបទល្មើសឡើយ ។ បញ្ហានេះ មានមតិជាច្រើនយល់ថា ក្រុមហ៊ុន ប្រេងសាំងសូគីម៉ិច ពិតជាបានយកឈ្មោះក្រុមហ៊ុនរបស់ខ្លួន រកស៊ីជួញដូរបទល្មើសព្រៃឈើ ខុសច្បាប់ប្រាកដមែន ។
តែផ្ទុយទៅវិញ បុរសចំណាស់ម្នាក់ បានអោយអ្នកយកព័ត៌មានដឹងថា រថយន្តក្រុមហ៊ុនប្រេងសាំងសូគីម៉ិច ដែលគេចាប់ខាងលើអាចក្លែង ក្លាយ ព្រោះថ្នាំបាញ់លើរថយន្តពណ៌ខ្ចី ជាងរថយន្តពិតប្រាកដ ហើយអ្នករកស៊ីឈើខុសច្បាប់នេះ អាចមានឈ្មោះ…….នៅ………មានខ្នងបង្អែកធំគ្រាន់បើដែរ ៕
