ប៉ៃលិន ៖ ប្រជាពលរដ្ឋក្រីក្រខ្វះខាតស្បៀងអាហារ ចំនួន ១៥០ គ្រួសារមកពី៨ឃុំ សង្កាត់ក្នុងខេត្តប៉ៃលិន ត្រូវបានក្រុមហ៊ុន ពេជ្រសំណាង សហការជាមួយព្រះសង្ឃមកពីវត្តថាវ៉ន វ៉ាណារ៉ាម នៅស្រុកពោងណាំរ៉នប្រទេសថៃ នាំយកអំណោយជាគ្រឿងឧបភោគបរិភោគ និងថវិកា មកចែកជូន ដើម្បីជួយដោះស្រាយការលំបាករបស់ពួកគាត់ ។ ការចែកអំណោយនេះត្រូវបានធ្វើឡើង កាលពីព្រឹកថ្ងៃទី២១ ខែតុលា ឆ្នាំ ២០១៤ នៅក្នុងបរិវេណវត្តបេងសុវណ្ណារ៉ាម ស្ថិតក្នុងភូមិក្ងោក ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
លោកស្រី ស៊ុំ ហៀង ប្រធានក្រុមហ៊ុនពេជ្រសំណាងបានឲ្យដឹងថា អំណោយដែលនាំយកមកចែកជូនប្រជាពលរដ្ឋនេះ គឺដើម្បីជួយដោះស្រាយការលំបាក់របស់ពួកគាត់ ទោះបីជាអំណោយនេះវាតិចតួចក៏ដ៏ដោយ តែជាទឹកចិត្តដើម្បីរួមចំណែក ជួយប្រជាពលរដ្ឋដែលមានជីវភាពខ្វះខាត ។ អំណោយទាំងនោះគឺបានការជួយឧបត្ថម្ភពីព្រះគ្រូវចៅអធិការវត្តថាវ៉ន វណ្ណារ៉ាម នៅស្រុកពោងណាំរ៉ន ប្រទេសថៃ រួមសហការជាមួយក្រុមហ៊ុនពេជ្រសំណាង នាំយកមកចែកជូនមាន អង្ករ មី ត្រីខ និងថវិកាចំនួន ១ ម៉ឺនរៀល ក្នុងមួយគ្រួសារ ។
លោកស្រី ជា លាភ អភិបាលរងខេត្តប៉ៃលិនបានឲ្យដឹងថាប្រជាពលរដ្ឋដែលមកទទួលអំណោយសរុបចំនួន ១៥០ គ្រួសារមកពីឃុំ សង្កាត់ទាំង៨ ក្នុងខេត្តប៉ៃលិន ។
លោកស្រីបានបន្តថា ក្នុងនាមអាជ្ញាធរខេត្តសូមថ្លែងអំណរគុណដល់លោកស្រី ហ៊ុម ហៀង ប្រធានក្រុមហ៊ុនពេជ្រសំណា និង ព្រះសង្ឈនៅវត្តថាវ៉ន់ វណ្ណារ៉ាម ប្រទេសថៃដែលបាននាំយកអំណោយមកចែកជូនដល់ប្រជាពលរដ្ឋដែលក្រីក្រខ្វះខាត ជាងគេ នៅក្នុងខេត្តប៉ៃលិន ៕
សំ គូលីន
