ខេត្តប៉ៃលិន ៖ មន្ត្រីសមត្ថកិច្ចស្ថាប័ន ប្រចាំច្រកទ្វារអន្តរជាតិព្រំមួយចំនួន កំពុងតែតម្រូវឱ្យប្រជាពលរដ្ឋដឹកសិផលទៅលក់ប្រទេសថៃ បង់ប្រាក់ច្រើន លើសលប់ ដោយមិនមានវិក័យប័ត្រ ត្រឹមត្រូវ ។ នេះបើតាមការអោយដឹងរបស់ប្រជាពលរដ្ឋដែលរកស៊ីដឹកកសិផលតាមរថយន្តតូច-ធំ នៅចុងខែតុលាឆ្នាំ២០១៤ ក្នុងនោះមាន លោក សុខ សាវុធ ប្រធានច្រកទ្វារអន្តរជាតិព្រំ លោកលឹម សម្បត្តិ ប្រធានស្នាក់ការគយនិងរដ្ឋាករច្រកទ្វាព្រំ លោកសួស សុខដារ៉ា ជាមេប៉ូលិសអន្តោប្រវេសន៍ច្រកទ្វាព្រំ។
បើតាមប្រភពព័ត៌មានពីប្រជាពលរដ្ឋដឹកកសិផលបានឱ្យដឹងថា កសិផលដែលពួកគាត់នាំចេញទៅលក់នៅប្រទេសថៃមាន ដូចជា ម្ទេស ត្រប់ ពោត ល្ពៅ ស្វាយ ជាដើម ៘ ដោយ កសិផលទាំងនោះគ្មានគីមីទេ គឺគាត់ដាំដុះដោយខ្លួនឯងខ្លះ និងប្រមូលទិញ ពីកសិករជិតខាងមួយចំនួន ដើម្បីប្រមូលយកទៅលក់នៅប្រទេសថៃ ។ ប៉ុន្តែបែរជាត្រូវក្រុមមន្ត្រីមាត់ច្រកទ្វារនេះ គាប ជម្រិតយកលុយពីលើកសិផលដែលខិតខំប្រឹងប្រែងដាំដុះ ដោយកម្លាំងយ៉ាងលំបាក ហើយមិនគួរបើក្រុមជំនាញ និងមន្ត្រីអន្តោ ប្រវេសន៍ចាំគាបជម្រិតយកលុយតាមតែអំពើចិត្តជាន់ឈ្លីកំណែទម្រង់ ស៊ីជម្រៅរបស់រដ្ឋាភិបាលយ៉ាងគឃ្លើនបំផុត យកទៅស៊ី ចាយ និងធ្វើមានធ្វើបានពីលើគំនរទុក្ខរបស់ប្រជាពលរដ្ឋ ។ ពួកសមត្ថកិច្ចនោះបានជម្រិតកំណត់យកតាមរថយន្តតូច-ធំ ដូចជារថយន្តប្រភេទសាំយ៉ុង គឺខាងសមត្ថកិច្ចខ្មែរយកលុយដល់ទៅចំនួន ១២៥០បាត និងជួនកាលជម្រិតយកលុយ ថ្លៃបាយទឹកជាបន្ថែមថ្លៃពឹងពាក់ការងារ និងថ្លៃជួយកាងការពារទំនិញខុសច្បាប់គេចពន្ធជាច្រើនពាន់បាតទៀត ដើម្បីជាការ បិទមាត់នូវកំហុសឆ្គង ទំនិញហាមខាត់ ឬទំនិញលើសបន្ទុកពន្ធមួយចំនួនដែលក្រុមមន្ត្រីជំនាញអស់នោះជាអ្នក ឃុបឃិត ។
មិនតែប៉ុណ្ណោះ ការជម្រិតយកលុយរបស់មន្ត្រី ៣-៤ស្ថាប័ន របស់ខ្មែរនោះ គឺអត់មានចេញវិក្កយបត្រទេ ចំណែកភាគីថៃគេយក ចំនួន ១០៥០បាត មែនតែមានវិក្កយបត្របញ្ជាក់ពីតម្លៃទំនិញទំនងត្រឹមត្រូវ។
ប្រភពខាងលើក៏បានអះអាងទៀតថា លុះពេលដឹកយកទៅលក់នៅប្រទេសថៃ គឺត្រូវមន្ត្រីសមត្ថកិច្ច ច្រកទ្វារ ជម្រិតទារលុយ ព្រមទាំងខាងភាគីថៃ ក៏ទារលុយដែរ សរុបទាំងអស់ដែលត្រូវចំណាយខុសខ្ទង់ក្រោមតុចំមុខដល់ទៅ ២៣០០បាត នេះសម្រាប់រថយន្តតូច ប្រភេទសាំយ៉ុងប៉ុណ្ណោះ ។ ឯចំណែករថយន្ត ធុនធំវិញ គេទារយកថ្លៃលើសនេះ ស្ទើរតែខាតចុងខាតដើមទាំងស្រុងថែមទៀតផង។ ពិសេសទៅទៀតបើតាមការសង្កេតសម្រាប់ក្រុមឈ្មួញនាំទំនិញធំៗ និងទំនិញនាំចូលមកពីប្រទេសថៃដែលបានបង់ប្រាក់ជាប្រចាំរបស់ក្រុមឈ្មួញ ធំៗមួយចំនួនដូចជាទីសុខា កុងទ្រី ប៉ុលស៊ីនួន លឹមគឹមអ៊ី វិញ គឺសមត្ថកិច្ចច្រកទ្វារ អោយនាំទំនិញចូលមក យ៉ាងស្អិតរមួតដូចស្ករតាំងម៉ែ ។
លោក សួស សុខដារ៉ា ដែលជាមេប៉ូលិសអន្តោប្រវេសន៍នេះធ្លាប់ត្រូវបានអង្គភាពប្រឆាំង អំពើពុករលួយ និងក្រសួងមហាផ្ទៃកោះហៅ និងព្រមានម្តងជាពីរដងរួចមកហើយ កាលអតីតនៅកាន់ជាមេអន្តោប្រវេសន៍ ច្រកទ្វារចាំយាម ខេត្តកោះកុង ពីបទឃុបឃិត និងពាក់ព័ន្ធ និងអំពើពុករលួយ ប៉ុន្តែដោយសារតែគាត់សំបូរលុយពុករលួយ និងមានខ្នងបង្អែកក្រាស់ផងនោះ ទើបធ្វើឱ្យគាត់មានវាសនាបានតោងជាប់ធ្វើជាមេអន្តោប្រវេសន៍ច្រកទ្វាព្រំ ប្រព្រឹត្តអំពើពុករលួយគាបចាប់ជម្រិតពីលើញើសឈាមប្រជាពលរដ្ឋក្រីក្រនាំកសិផលឆ្លងដែននៅច្រក ទ្វារព្រំ តាមអំពើចិត្តលើគំនរទុក្ខសោករបស់ឈ្មួញតូចតាច និងប្រជាពលរដ្ឋទន់ខ្សោយ។
លោកសួស សុខដារ៉ា ក្រោយពីបានទទួលតំណែងជាមេប៉ូលីស អន្តោប្រវេសន៍ច្រកទ្វាព្រំ (ខេត្តប៉ៃលិន) ហើយមិនបានកែខ្លួនឡើយ កំពុងតែបញ្ចេញឥទ្ធិពលគាបជម្រិតកោសរូស ធ្វើបាបឱ្យប្រជាពលរដ្ឋអោយ បង់លុយក្រោមតុ ខុសគោលការណ៍កំណត់របស់ក្រសួងមហាផ្ទៃ ហើយបានធ្វើឱ្យប្រជាពលរដ្ឋឈ្មួញតូចតាច ស្រែកក្តៅក្រហាយ និងសូមសំណូមពរឱ្យក្រសួងមហាផ្ទៃ គួរតែចុះត្រួតពិនិត្យជាបន្ទាន់ផង ។
ជុំវិញបញ្ហានេះ លោក សុខ សាវុធ ប្រធានច្រកទ្វារអន្តរជាតិព្រំគេសង្ស័យថា អាចមានចំណែកពាក់ព័ន្ធយ៉ាងជ្រៅនូវពីក្រោយអំពើពុករលួយរបស់ក្រុមមន្ត្រីទាំងនោះផងដែរ៕
