បាត់ដំបង ៖ បុរសម្នាក់មានកូនតូច ២ នាក់ ទប់កំហឹងមិនបានពេលប្រពន្ធសុំលែងលះ រកប្តីថ្មី បានយកកូនកាំបិតចាក់ប្រពន្ធបណ្តាលអោយរបួសនាងប្តឹងអាវុធហត្ថឃាត់ខ្លួនកាលពីរសៀលថ្ងៃទី១៨ខែមិថុនាឆ្នាំ២០១៤ ។
ហេតុការណ៍បង្កស្នាមរបួសកើតឡើង កាលម៉ោង ៤ រសៀល ថ្ងៃទី១៧ ខែមិថុនា ឆ្នាំ២០១៤ នៅចំណុចបរិវេណវត្តពោធិ៍វង្ស ភូមិចំការំរោង១ សង្កាត់ចំការសំរោង ក្រុងបាត់ដំបង ។
បុរសម្នាក់សង្ស័យ ត្រូវបញ្ជូនទៅសាលាដំបូង នាព្រឹកថ្ងៃទី១៩ ខែមិថុនា ឆ្នាំ២០១៤ ចាត់ការតាមនិតិវិធី ។
លោក ឡាច ប្រុស នាយការិយាល័យការិយាល័យស្រាវជ្រាវ ប្រឆាំងបទល្មើសអាវុធហត្ថខេត្តបានអោយដឹងថា ជនសង្ស័យដែលឃាត់ខ្លួន មានឈ្មោះ ភិន ស៊ីឡូ អាយុ៣២ឆ្នាំ របរជាកម្មករសំណង់ ត្រូវជាប្តីជានរងគ្រោះ ស្នាក់នៅមិនប្រាកដ មានស្រុកកំណើតភូមិរកាក្រោម ឃុំសំបួរមាស ស្រុកកំពង់សៀម ខេត្តកំពង់ចាម ដកហូតបានវត្ថុតាងកូនកាំបិតចិត្តបន្លែថ្មី ១ ដើមប្រលាក់ឈាម ។ ស្ត្រីរងគ្រោះឈ្មោះ អ៊ួង សុខលី អាយុ ២៩ ឆ្នាំ មុខរបរលក់ដូររបួសមេដៃសងខាង រស់នៅភូមិកាប់គោ សង្កាត់អូរចារ ក្រុងបាត់ដំបង ។ ទាំង២នាក់មានកូន ២ នាក់ ។
បុរសសង្ស័យឈ្មោះ ភិន ស៊ីឡូ បានសារភាពថា ខ្លួននិងជនរងគ្រោះឈ្មោះ អ៊ួង សុខលី បានគ្នាជាប្តីប្រពន្ធបានកូន ២ នាក់ ដោយជីវភាភក្រីក្រនៅដើមខែមករា ឆ្នាំ២០១៤ បានលក់ដីផ្ទះលំនៅដ្ឋាន ភូមិកាប់គោ សង្កាត់អូរចារសងបំណុលគេអស់ ។ បន្ទាប់មកប្រពន្ធ បានអោយខ្ញុំនាំកូនទាំង ២ នាក់ទៅប្រទេសថៃមុន ចាំនាងធ្វើដំណើរទៅតាមក្រោយ ដោយចាំនាងនៅប្រទេសថៃយូរពេក នៅថ្ងៃទី០៩ ខែមេសា ឆ្នាំ២០១៤ ខ្លួនបាននាំកូនទាំង២នាក់ពីប្រទេសថៃ ត្រឡប់មកខេត្តបាត់ដំបងវិញ ។ ពេលមកដល់កន្លែងភូមិធ្លាប់រស់នៅជួបនាង ឈ្មោះ អ៊ួង សុខលី ជាប្រពន្ធ រស់ផ្ទះបងស្រីនាង ហើយប្រពន្ធខ្ញុំនិយាយថា ឯងទៅស្រុកកំណើតខេត្តកំពង់ចាមសិនចុះ ចាំត្រឡប់មកវិញ យើងរស់នៅជាមួយគ្នា ។ ពេលទៅស្រុកកំណើត ទូរស័ព្ទមកនាងមិនចូល ខ្លួនបានទូរស័ព្ទមកអ្នកជិតខាងសុំជួបប្រពន្ធនាងបានឆ្លើយថា នាងមានប្តីថ្មីហើយ ឈប់ទាក់ទងគ្នាយើងលែងលះគ្នា ។ ពេលឮដូច្នេះ ខ្លួនមានកំហឹងបានទិញកូនកាំបិតដាក់ជាប់ខ្លួន ទុកគំរាម មិនមានបំណងសំលាប់នាងទេ រួចធ្វើដំណើរមកខេត្តបាត់ដំបង ។ ពេលមកដល់ខេត្តបាត់ដំបង នាងបានណាត់ជួបនៅក្នុងវត្តពោធិ៍វង្ស ដើម្បីទៅសង្កាត់ធ្វើការលែងលះគ្នា ពេលជួបមុខគ្នា ខ្ញុំសួរនាងថា បើលែងលះគ្នា តើកូនទាំង២នាក់គិតយ៉ាងណា? នាងជាប្រពន្ធថា មិនអោយវារាប់រកម្តាយក៏បាន ចង់គិតយ៉ាងណាស្រេចតែចិត្ត ។ ភ្លាមនោះ ខ្លួនខឹងបានស្ទុះចាប់ក្បាលបោចសក់នាងកាន់កូនកាំបិតគំរាម មិនអោយអ្នកផ្សេងចូលជួយ ភ្លាមៗនាងបានរើបំរាស់ប្រតាយបណ្តាលអោយមុតដៃតែម្តង ។
លោក ឡាច ប្រុស បានបញ្ជាក់ថា បុរសម្នាក់សង្ស័យ និងវត្ថុតាងកូនកាំបិតចិត្តបន្លែចុងស្រួចត្រូវ កសាងសំណុំរឿងបទ ហឹង្សារចេតនាបញ្ជូន ទៅតុលាការ នាព្រឹកថ្ងៃទី ១៩ ខែមិថុនា ឆ្នាំ២០១៤ ចាត់ការតាមនិតិវិធី ៕
