0

លោក សាន​ច​យ និង​លោក ទឹម ប៊ុន​លីន និង​ក្រុម​ឈ្មួញ​សម្រុក​កាប់​ឈើ​ខុសច្បាប់​នៅ​ខេត្ត​ស្ទឹងត្រែង ក្រោមរូបភាព​ស្តារ​បាត​អាង ធ្វើ​វា​រី​អគ្គិសនី​សេ​សាន​ក្រោម​២

លោក សាន​ច​យ និង​លោក ទឹម ប៊ុន​លីន និង​ក្រុម​ឈ្មួញ​សម្រុក​កាប់​ឈើ​ខុសច្បាប់​នៅ​ខេត្ត​ស្ទឹងត្រែង  ក្រោមរូបភាព​ស្តារ​បាត​អាង  ធ្វើ​វា​រី​អគ្គិសនី​សេ​សាន​ក្រោម​២

​ខេត្ត​ស្ទឹងត្រែង​៖ លោក​សាន ច​យ និង​លោក​ទឹម ប៊ុនលី​ន​និង​មន្ត្រី​ប្រដាប់អាវុធ និង​មន្ត្រី​រដ្ឋបាល​ព្រៃឈើ រួម​ទាំង​ក្រុម​ឈ្មួញ​សម្រុក​កាប់​ឈើ​ខុសច្បាប់ នៅ​ខេត្ត​ស្ទឹងត្រែង​ពាស​វាល​កាល​លើស​ដែន​កំណត់ ក្រោមរូបភាព​ស្តារ​បាត​អាង  ធ្វើ​វា​រី​អគ្គិសនី​ក្នុង​អាង​ស្តុក​ទឹក​នៃ​គម្រោង​វា​រី​អគ្គិសនី​សេ​សាន​ក្រោម​២ ស្ថិតនៅ​ខេត្ត​ស្ទឹងត្រែង​កាប់​ខុស​គោលដៅ ដូចជា​ឃុំ​តា​ឡា​ត ខ្សាច់​ថ្មី ដល់​ស្រុក​សៀម​ប៉ាង កន្ទុយ​នាគ និង​ឃុំ​ស្តៅ  រហូត​ដល់​ញើន​ជាប់​ព្រំប្រទល់​ឡាវ​។​

​ប្រភពពី​ប្រជាពលរដ្ឋ​រស់នៅ​ក្នុង ស្រុក​សេ​សាន ខេត្ត​ស្ទឹងត្រែង បានឲ្យដឹងថា បទល្មើស​កាប់​ឈើ និង​ដឹកជញ្ជូន​ឈើ​ចេញ​ពី​តំបន់​ខាងក្រៅ​បាត​អាង ទំនប់​វា​រី​អគ្គិសនី​សេ​សាន​ក្រោម​២ កំពុង​កើតឡើង​យ៉ាង​រាលដាល​ដោយសារ​ក្រុម​ឈ្មួញ ប្រើប្រាស់​អាជ្ញាប័ណ្ណ ក្រុមហ៊ុន​សំអាត​បាត​អាង​ធ្វើឲ្យ​ឈើ​ខុសច្បាប់​ក្លាយ​ជា​ឈើ​ស្របច្បាប់ ។ បញ្ហា​កាប់​ព្រៃឈើ​នេះ​មាន​ទាំង​មន្ត្រី​ប្រដាប់​អា​វុទ្ធ​និង​មន្ត្រី​រដ្ឋបា​ល​ព្រៃឈើ​ចូលរួម​កាប់​សម្រូល​ឈើ​ធ្វើ​អាជីវកម្ម​ផងដែរ​។​

​ប្រជា​សហគមន៍​ក្នុង ឃុំ​ស្រែគរ ស្រុក​សេ​សាន បានឲ្យ​ដឹង​ផងដែរ​ថា អាជ្ញាធរ​ខេត្ត​ស្ទឹងត្រែង មន្ត្រីរដ្ឋបាល​ព្រៃឈើ មន្ត្រី​បរិស្ថាន និង​សមត្ថកិច្ច ពាក់ព័ន្ធ​ដទៃទៀត មិន​ត្រួតពិនិត្យ​ឈើ​ខុសច្បាប់​ដែល​ឈ្មួញ​ដឹក​ចេញពី​តំបន់​ក្រៅ​បាត​អាង ចូលទៅក្នុង​តំបន់​ផ្ទៃ​អាង​ទំនប់ វា​រី​អគ្គិសនី​សេ​សាន​ក្រោម​២​នោះទេ ដោយ​ពលរដ្ឋ​ចោទសួរ​ថា មក​ពី​អំណាច និង​ទឹកប្រាក់​លោក ឧកញ្ញា គិត​-​ម៉េង ធំ​ពេក​មិន​ហ៊ាន​បង្ក្រាប ឬ​មក​ពី​ផលប្រយោជន៍​ផ្ទាល់ខ្លួន​ណាមួយ​ទេ​ដឹង​?​។​

​បើ​យោង​ទៅ​តាម​របាយការណ៍​អង្កេត​របស់​ក្រុម​កិច្ចការ​ពិសេស​សិទ្ធិ​មនុស្ស​កម្ពុជា​    ​បានឲ្យដឹងថា​យ៉ាងហោចណាស់​ក៏​មាន​ម៉ាស៊ីន​រ៉ៃ​ខ្នាត​យក្ស​ប្រមាណ ៤០​គ្រឿង​និង​មាន​ឡាន​ដឹកឈើ​ធំៗ បាន​ដឹក​ជញ្ជូន​ឈើ​ចូល​នៅក្នុង​រោងចក្រ​អារឈើ​១០​គ្រឿង​ក្នុង​រយៈពេល​មួយ​ម៉ោង នៅក្នុង​ទំនប់​វា​រី​អគ្គិសនី​សេ​សាន​ក្រោម​២ នៅតាម​បណ្តោយ​ទន្លេសេសាន ស្ថិតនៅក្នុង​ភូមិ​ស្រែគរ ឃុំ​ស្រែគរ ស្រុក​សេ​សាន ខេត្ត​ស្ទឹងត្រែង​។​

​របាយការណ៍​បញ្ជាក់​ថា​៖ «​យើង​សង្កេតឃើញ​មាន​រោងចក្រ​អារឈើ​ដ៏​ធំ​មហិមា​មួយ​ដែល​មាន​ការកាប់​ឈើ​ដឹកជញ្ជូន និង​ផ្គត់ផ្គង់​ឈើ​អស់​រយៈពេល ៥​ឆ្នាំ​មកហើយ ដែល​មាន​ទីតាំងនៅ​តាម​បណ្តោយ ទន្លេសេសាន ត្រង់ចំណុច GPS០៦៥១៨៤៤, ១៥៩៨៥៧៤»​។ រោងចក្រ​អារឈើ​នៅ​បាត​អាង​មាន​ម៉ាស៊ីន​រ៉ៃ​ខ្នាត​យក្ស​ប្រមាណ​ជាង ៤០​គ្រឿង មាន​កម្លាំង​ប្រដាប់​ដោយ​អាវុធ​យាមកាម​យ៉ាង​តឹងរ៉ឹង មិន​អនុញ្ញាត​ឲ្យ​នរណា​ចេញ​ចូល​បាន​ឡើយ ដោយ​មាន​កម្មករ​រាប់រយ​នាក់​ដឹកឈើ​ហ៊ុប​ធំៗ​ចូល​ក្នុង​រោងចក្រ​អារឈើ​។​

​ប្រភព​ពី​ក្រសួង​រ៉ែ​និង​ថាមពល​បានឲ្យដឹងថា ទំនប់​វា​រី​អគ្គិសនី​សេ​សាន​ក្រោម​២​ក្នុង​ខេត្ត​ស្ទឹងត្រែង​នឹង​ចាប់ផ្តើម​ដំណើរការ​ជំហាន​សាកល្បង​នៅក្នុង​ខែវិច្ឆិកា​ឆ្នាំ​២០១៧​ខាងមុខនេះ ខណៈ​ប្រជាពលរដ្ឋ​ដែល​រងគ្រោះ​ពី​ការ​ធ្វើ​វា​រី​អគ្គិសនី​ជាង​១០០​គ្រួសារ​ក្នុង​ស្រុក​សេ​សាន នៅ​មិន​ព្រម​ទទួល​សំណង​ដែល​ផ្តល់​ដោយ​រដ្ឋាភិបាល​នៅឡើយ ។ ក្នុង​ការកសាង​
​វា​រី​អគ្គីសនី​សេ​សាន​២​នេះ​ដែល​មាន​តម្លៃ​៨០០​លាន​ដុល្លារ​អាមេរិក​ដែលជា​កិច្ចសហការ​រវាង​ក្រុមហ៊ុន​ចំនួន​៣ ក្នុងនោះ​មាន​ក្រុមហ៊ុន​ចិន ឈ្មោះ​China’s Lancang Hydropower International Energy ដែល​មាន​ចំណែក​ហ៊ុន​៥១​ភាគរយ ក្រុមហ៊ុន​រ៉ូយ៉ាល់​គ្រុបរ​បស់​ឧកញ៉ា គិត ម៉េង ចំនួន​៣៩​ភាគរយ និង​ក្រុមហ៊ុន​វៀតណាម​ឈ្មោះ Vietnam’s EVN International ដែល​មាន​ចំណែក​ហ៊ុន​១០​ភាគរយ​។​
​អ្វី​ដែល​ជា​ការកត់សម្គាល់​ក្រៅពី​មាន​ផលប៉ះពាល់​ដល់​ប្រជាពលរដ្ឋ​គឹ​សកម្មភាព​កាប់បំផ្លាញ​ឈើ​ធ្វើ​អាជីវកម្ម​ខុសច្បាប់​នៅ​ខេត្ត​ស្ទឹងត្រែង​ក្រោម​រូបភាព​នៃ​អាជ្ញា​បណ្ណ័​ស្តារបាត​អាង​ដែល​មាន​ទំហំ​តែ​ជាង​៣​ម៉ឺន​ហិកតា​របស់​ឧកញ៉ា​គិត​ម៉េង​ប្រធាន​ក្រុមហ៊ុន​រ៉ូយ៉ាល់​គ្រុប​ត្រូវបាន​គេ​រាយការណ៍​ថា​៖​បាន​កើតឡើង​ដោយ​គ្មាន​ការត្រួតពិនិត្យ​ឡើយ ។​

​កាលពី​ខែ​វិច្ឆិកា ឆ្នាំ​២០១៣ លោក ប៊ុន អ៊ុយ រដ្ឋលេខាធិការ​ទីស្ដីការគណៈរដ្ឋមន្ត្រី បាន​ចេញ​លិខិត ដោយ​សរសេរថា ឧបនាយករដ្ឋមន្ត្រី រដ្ឋមន្ត្រី​ទទួលបន្ទុក​ទីស្ដីការគណៈរដ្ឋមន្ត្រី ជម្រាបជូន ឯកឧត្តម រដ្ឋមន្ត្រី ក្រសួង​កសិកម្ម រុក្ខា​ប្រមាញ់ និង​នេសាទ ស្ដីពី​ករណី​របាយការណ៍​វឌ្ឍនភាព លើ​ការអនុវត្ត​សេចក្តីជូនដំណឹង របស់​រាជរដ្ឋាភិបាល​ស្ដីពី​ការ​ផ្អាក​សកម្មភាព​ប្រមូល​ផល អនុផល​ព្រៃឈើ​របស់​ក្រុមហ៊ុន Ang & Associates Lawyers Co.,Ltd ដែល​កាប់​ឈើ​នៅ​ក្នុង​អាង​ស្តុក​ទឹក​នៃ​គម្រោង​វា​រី​អគ្គិសនី​សេ​សាន​ក្រោម​២ ស្ថិតនៅ​ខេត្ត​ស្ទឹងត្រែង មេត្តា​ជ្រាប​ថា មិន​ត្រូវ​ឲ្យមាន​ការប្រមូលទិញ​ពី​ប្រភព​ខាង​ក្រៅ​តំបន់អ​នុ​ញ្ញាត​ឲ្យធ្វើ​អាជីវកម្ម​របស់​ខ្លួន ពីព្រោះ​ការប្រមូលទិញ​បែប​នេះ​នឹង​ក្លាយ​ជា​ទីផ្សារ​មួយ​ដែល​លើកទឹកចិត្ត​ឲ្យមាន​ការកាប់​ឈើ​ដោយ​អនាធិបតេយ្យ​។​

​ទោះជា​មាន​សារាច​រណ៍​ណែនាំ​យ៉ាងណា រហូតមកដល់​ថ្ងៃ​ទី​១៤ ខែ​មិនា ឆ្នាំ​២០១៧ ក៏​គ្មាន​អ្នកណា​ស្តាប់​និង​ផ្អាក​សកម្មភាព​ឡើយ ។ ម្យ៉ាង​ដោយ​សារ​ឥទ្ធិពល​លោក​ឧកញ៉ា គិត ម៉េង និង​ម្យ៉ាង​ដោយសារ​មេព្រៃ​ដឹកនាំ​ដោយ​លោក ឈាង តុលា និង​មន្ត្រី​មាន​សមត្តកិច្ច​ផ្សេង​ទៀត​ទទួលបាន​លា​ភ​សក្ការៈ ចឹង​ត្រូវធ្វើ​ប្រព្រឹត្ត​ខុស​ជា​កន្ទេល​ធំ​បន្លំ​ដេក ពី​បញ្ហា​បទល្មើស​លាង​ឈើ​កខ្វក់​ឲ្យក្លាយ​ជា​ឈើ​ស្របច្បាប់ ក្រោម​អាជ្ញា​បណ្ណ័​ស្តារបាត​អាង​នេះ​តែម្តង​ទៅ ៕

 

IMG-20170314-WA0005 IMG-20170314-WA0004 IMG-20170314-WA0003 IMG-20170314-WA0006

Filed in: ព័ត៌មានជាតិ, ព័ត៌មានសំខាន់

Recent Posts

Bookmark and Promote!