ខេត្តស្ទឹងត្រែង ៖ កាលពីយប់ថ្ងៃទី១២កុម្ភៈខែ២០១៧ រថយន្តសាំយ៉ុងមួយគ្រឿង លួចដឹកឈើក្តារចំនួន៦១សន្លឹកតាមផ្លូវលំត្រូវបានគណៈបញ្ជាការឯកភាពស្រុកសៀមបូកសហការជាមួយកម្លាំងកងរាជអាវុធហត្ថស្រុកចុះបង្ក្រាប អ្នកបើកបររត់គេចខ្លួនបាត់ ក្នុងភូមិស្រែក្រសាំងឃុំស្រែក្រសាំងស្រុកសៀមបូកខេត្តស្ទឹងត្រែង។
បើតាមប្រភពព័ត៍មានអោយដឹងថារថយន្តដែលកម្លាំងសមត្ថកិច្ចចុះបង្ក្រាបនោះជាប្រភេទរថយន្តសាំយ៉ុងពណ៍ខៀវពាក់ស្លាកលេខកំពង់ធំ2A0801ចេញដំណើរពីខេត្តស្ទឹងត្រែងក្នុងគោលដៅឆ្ពោះទៅកាន់ទីផ្សារនៃការទិញលក់ឈើប៉ុន្តែដោយសារមានការរាយការណ៏ពីប្រជាពលរដ្ឋពីរថយន្តដឹកឈើបានបើកឆ្លងកាត់ក្នុងទឹកដីមូលដ្ឋានរបស់ស្រុកទើបកម្លាំងបានសហការគ្នាចុះបង្ក្រាបបានតែម្តង។
ប្រភពបន្តថាខណៈដែលចុះបង្ក្រាបតៃកុងបានរត់គេចខ្លួនបាត់ស្រមោលផងដែរ។លោកអនុសេនីយ៏ឯកហេងណានមេបញ្ជាការស្តីទីស្រុកសៀមបូកបានអោយដឹងថាឈើនោះជាប្រភេទឈើក្តាត្រាចមានចំនួន៦១សន្លឹកស្មើនិង០,៧៣២ម៉ែត្រគូប។លោកបន្តថាក្រោយការបង្ក្រាបវត្ថុតាងបទល្មើសព្រៃឈើនិងត្រូវប្រគល់ជូនទៅកាន់អូរពងមាន់នាព្រឹកនេះផងដែរ។
បើតាមសេចក្តីរាយការណ៏ពីប្រជាពលរដ្ឋក្នុងខេត្តស្ទឹងត្រែងវិញអោយដឹងថា រថយន្តសាំយ៉ុងដឹកអ្នកដំណើរភាគច្រើន ដែលចេញពីខេត្តសម្បូរទៅដោយការបង្កប់ឈើប្រណិត ហើយរថយន្តសាំយ៉ុងមួយចំនួនធំទៀត គឺបានរៀបក្បួនជាជួរ ឬបើកទន្ទឹមគ្នា ដឹកជញ្ជូនបទល្មើសព្រៃឈើជារៀងរាល់ថ្ងៃតាមដងផ្លូវជាតិលេខ៧អាប៉ុន្តែមិនត្រូវបានបង្ក្រាបឡើយ ។ បច្ចុប្បន្នឈើ និងរថយន្តបានប្រគល់ជូនរដ្ឋបាលព្រៃឈើចាត់ការតាមនិតិវិធី ៕